काठमाडौं । नेकपा एमालेले प्रतिनिधिसभाको समानुपातिकतर्फ १६ जना उम्मेदवारको नाम निर्वाचन आयाेगलाई सिफारिस गर्ने निर्णय गरेको छ।
पार्टी अध्यक्ष केपी शर्मा ओलीलाई पितृशोक परेका कारण उपाध्यक्ष रामबहादुर थापा (बादल) को अध्यक्षतामा बसेको सचिवालय बैठकले समानुपातिक उम्मेदवारहरूको टुंगो लगाएको हो।
पार्टी उपमहासचिव लेखराज भट्टले बैठकका निर्णय सार्वजनिक गर्दै क्लस्टरका आधारमा १६ जनाको नाम निर्वाचन आयोगमा पठाउने निर्णय भएको जानकारी दिनुभयो।
उहाँका अनुसार आदिवासी जनजाति क्लस्टरतर्फ भूमिका सुब्बा (महिला), गंगादेवी श्रेष्ठ (महिला), रामबहादुर थापा मगर (पुरुष) र कुलभक्त शाक्य (पुरुष) को नाम सिफारिस गरिएको छ।
त्यसैगरी खस आर्य क्लस्टरतर्फ पद्मा अर्याल (महिला), टुकाभद्रा हमाल (महिला), गुरुप्रसाद बराल (पुरुष), पुष्पराज कँडेल (पुरुष) र यशोदा कुमारी बराल (पिछडिएको क्षेत्र, अपाङ्गता तथा महिला क्लस्टरसमेत) रहेका छन्।
थारु क्लस्टरतर्फ कृपाराम राणा रहेका छन् भने दलित क्लस्टरतर्फ विष्णुमाया विक र निता घतानीको नाम सिफारिस गरिएको छ। त्यस्तै मधेसी क्लस्टरतर्फ रिंगला यादव, यशोदा कुमारी र चन्द्रेश्वर मण्डल रहेका छन् भने मुस्लिम क्लस्टरतर्फ साजिदा सिद्धिकीको नाम सिफारिस भएको उपमहासचिव भट्टले बताउनुभयो।
उहाँले भन्नुभयो, “आज सचिवालयको चौथो बैठक उपाध्यक्ष रामबहादुर थापाको अध्यक्षतामा बस्यो। अध्यक्ष केपी शर्मा ओलीलाई पितृशोक परेको कारण उहाँले बैठकको अध्यक्षता गर्नुभएन। बैठकमा दुई वटा प्रस्ताव थिए—एक समानुपातिक उम्मेदवारको निर्णय र अर्को शोक प्रस्ताव। बैठकले क्लस्टर अनुसार १६ जनाको नाम निर्वाचन आयोगलाई सिफारिस गर्ने निर्णय गरेको छ।”
