वीरगंज । पर्साको वीरगंज महानगरपालिका–२६ स्थित शिवम एग्रो इन्डस्ट्रीस प्रालिबाट ठूलो परिमाणमा चामल चोरी भएको घटना सार्वजनिक भएको छ।
स्थानीयका अनुसार होली पर्वको एक दिनअघि रातिको समयमा मिलबाट ६० बोरा भन्दा बढी चामल चोरी भएको हो ।
चामल चोरी गरेको आरोपमा मिलकै दुई जना कर्मचारीलाई प्रहरीले पक्राउ गरेको छ । जिल्ला प्रहरी कार्यालय पर्साका प्रवक्ता प्रहरी नायब उपरीक्षक हरि बहादुर बस्नेतका अनुसार पक्राउ परेकामाथि चोरी सम्बन्धी कसुरमा जिल्ला अदालत पर्साबाट म्याद लिई अनुसन्धान भइरहेको छ।
प्रहरीका अनुसार पक्राउ पर्नेमा वीरगंज महानगरपालिका–१७ निवासी नितेश सहनी र सुमन सहनी रहेका छन् । उनीहरु दुबै जना इन्डस्ट्रीस कै कर्मचारी हुन् ।
प्रहरीले वीरगंज–१७ शिवान टोलस्थित बिक्रम पटेलको घरबाट ४० बोरा चामल समेत बरामद गरेको छ । उक्त चोरी घटनामा अन्य व्यक्तिहरु समेत संलग्न रहेको आशंका गरिएको प्रहरीले जनाएको छ ।
प्रहरीले घटनामा संलग्न अन्य व्यक्तिहरुको खोजी तीव्र बनाएको छ । प्रहरीले खोजतलास सुरु गरेपछि गाउँका एक दर्जनभन्दा बढी युवक फरार भएको स्थानीयहरुले बताएका छन्।
प्रहरीले फरार व्यक्तिहरुको खोजी तथा घटनाबारे थप अनुसन्धान जारी रहेको जनाएको छ ।
