वीरगंज । पर्सा निर्वाचन क्षेत्र नम्बर १ का नेकपा एमालेका उम्मेदवार प्रदीप यादवले आइतबार वीरगंज महानगरपालिका वडा नम्बर १६ नगवामा घरदैलो तथा जनता दर्शन कार्यक्रम सम्पन्न गरेका छन्।
आइतबार बिहान चुनावी घरदैलोका क्रममा नगवा पुगेका यादवलाई स्थानीयवासीले भव्य स्वागतसहित समर्थन जनाएका थिए। घरघरबाट स्वस्फूर्त रूपमा निस्किएका महिला मतदाताले यादवलाई टीका लगाउँदै जीतको आशीर्वाद दिएका थिए।
घरदैलोका क्रममा स्थानीयले चुनावका बेला मात्रै भोट माग्न आउने नेता आफूहरूलाई नचाहिएको स्पष्ट पार्दै जनताको हरेक दुःख–सुखमा साथ दिने नेतृत्वलाई नै यसपटक पनि रोज्ने आश्वासन दिएका थिए।
मतदातासँगको संवादमा पूर्वमन्त्री समेत रहेका यादवले फागुन २१ गते हुने निर्वाचनले देशको भविष्य निर्धारण गर्ने भएकाले सही नेतृत्वलाई जनताले आफ्नो अमूल्य मत दिनुपर्नेमा जोड दिए। उनले अघिल्ला दुई कार्यकालमा आफूले क्षेत्रको विकास र जनसेवामा खेलेको भूमिकाको मूल्यांकन गरिदिन मतदातासँग आग्रह गरे।
“म चुनावका बेला मात्र देखिने मौसमी नेता होइन,” यादवले भने, “व्यापारीले आफ्नो नाफा–घाटा मात्र हेर्छ। चुनावलाई पनि व्यापारझैं हिसाब गर्ने प्रवृत्तिबाट जनता सचेत हुनुपर्छ।”
मुलुक स्टण्टले नचल्ने उल्लेख गर्दै उनले वर्तमान संकटबाट देशलाई निकास दिन सक्ने एकमात्र राजनीतिक शक्ति नेकपा एमाले नै भएको दाबी गरे। विकास र समृद्धिको स्पष्ट खाका एमालेसँग मात्र रहेको बताउँदै उनले भने, “स्टण्ट गर्नेहरूले भोटका लागि जे पनि बोल्न सक्छन्, तर चुनावपछि कहाँ गायब हुन्छन् भन्ने पत्तो हुँदैन। त्यसैले देशलाई संकटबाट निकालेर समृद्धिको दिशामा अघि बढाउन सक्ने पार्टी एमालेलाई नै मत दिनुहोस्।”
घरदैलो कार्यक्रमका क्रममा नगवाका विभिन्न टोलमा पुगेर यादवले मतदातासँग प्रत्यक्ष भेटघाट, संवाद तथा आशीर्वाद ग्रहण गरेका थिए।
