वीरगंज । नेपाली कांग्रेसका सभापति गगनकुमार थापाले जेनजी आन्दोलनका शहीदहरूको बलिदानी खेर जान नदिने प्रतिबद्धता व्यक्त गरेका छन् । शनिबार वीरगंजमा नेपाली कांग्रेस पर्साले आयोजना गरेको चुनावी सभालाई सम्बोधन गर्दै उनले आन्दोलनका क्रममा ज्यान गुमाएका युवाहरूको सपना पूरा गर्न कांग्रेस दृढ संकल्पका साथ अघि बढेको बताएका हुन्।
थापाले जेनजी आन्दोलनमा दर्जनौँ युवाले जीवन गुमाएको उल्लेख गर्दै शोकमा रहेका परिवारका लागि चुनावमा कसले जित्छ वा हार्छ भन्ने विषय गौण भएको बताए । “उहाँहरूका लागि मुख्य कुरा भनेको आफ्ना सन्तानले देखेको सपना पूरा हुन्छ कि हुँदैन भन्ने हो,” उनले भने, “त्यो सपना हामीले हार्न दिन्नौँ, कांग्रेसले हार्न दिन्न।”
देश हाँक्ने नेतृत्वमा गति मात्र होइन, सोच र विवेक पनि सही हुनुपर्ने उनको भनाइ थियो । विगतका गल्ती नदोहोर्याउने प्रतिबद्धता जनाउँदै उनले भने, “तीव्रता आवश्यक छ, तर गाडी चलाउने चालकको सोच पनि ठीक हुनुपर्छ। केवल उत्ताउलो भएर हुँदैन, सुझबुझ पनि चाहिन्छ। कांग्रेसको प्रतिबद्धता छ—अबको पाँच वर्ष देशलाई तीव्र गतिमा अघि बढाउँछौँ, तर दुर्घटनामा पर्न दिँदैनौँ।”
आर्थिक वृद्धि नभएसम्म रोजगारी सिर्जना हुन नसक्ने उल्लेख गर्दै उनले निजी क्षेत्रको मनोबल उकास्न कांग्रेससँग स्पष्ट योजना रहेको बताए।
आफूलाई ‘नयाँ’ भन्दै प्रचार गर्ने शक्तिहरूको भ्रममा नपर्न मतदातालाई आग्रह गर्दै थापाले २०६४ सालको सन्दर्भ स्मरण गरे। उनले माओवादी केन्द्रलाई संकेत गर्दै त्यसबेला पनि नयाँ नेपालको नारा लगाइए पनि अपेक्षित परिवर्तन नआएको टिप्पणी गरे। “केवल नयाँ भन्ने शब्द उच्चारण गरेर मात्र परिवर्तन हुँदैन। नयाँका लागि सपना र दृढ संकल्प आवश्यक हुन्छ, त्यो कांग्रेससँग छ,” उनले बताए।
हिजो कांग्रेस, एमाले, माओवादी वा मधेसी दलमा रहेका व्यक्ति अहिले टिकट किनेर अन्य दलबाट उम्मेदवार बन्दैमा नयाँ नहुने उनको भनाइ थियो।
पर्सा कांग्रेसका सभापति जनार्दनसिंह क्षेत्रीको अध्यक्षतामा सम्पन्न आमसभामा पर्सा–१ का उम्मेदवार अनिल रुंगटा, पर्सा–२ का अजय चौरसिया, पर्सा–३ का सुरेन्द्र चौधरी, पर्सा–४ का रमेश रिजाल, संविधानसभा सदस्य राजेन्द्र बहादुर अमात्य, नेपाल विद्यार्थी संघ पर्साका सभापति रमेश यादव तथा नेपाल तरुण दल पर्साका सभापति विकास तिवारीलगायतले सम्बोधन गरेका थिए।
वीरगंज घण्टाघरस्थित पार्कमा भएकाे सभालाई सम्बाेधन गर्दै थापाले पर्सा जिल्लाका चारवटै निर्वाचन क्षेत्रमा कांग्रेस विजयी हुने दाबीसमेत गरे ।
