वीरगंज । पर्सा क्षेत्र नं. १ का वीरगंज महानगरपालिका वडा नम्बर १२ र १३ मुर्लिमा जनमतका उम्मेदवार ओमप्रकाश सर्राफले घरदैलो, भेटघाट र आशीर्वाद ग्रहण कार्यक्रम सम्पन्न गरेका छन् । घरदैलोका क्रममा स्थानीयबासी र युवाहरूले उम्मेदवार सर्राफलाई फूलमाला, खादा र सम्मानसहित स्वागत गरेका थिए।
उम्मेदवार सर्राफले भने, “वीरगंजलाई भोट बैंकको रुपमा प्रयोग गर्ने र मतदाता ठग्ने प्रवृत्तिमा यसपालि अन्त्य हुने छ । जनता हरन छापमा मतदान गर्दै जनमत पार्टीलाई सहयोग गर्न आतुर छन् ।” उनले स्थानीय बासिन्दासँग प्रत्यक्ष संवाद गर्दै क्षेत्रमा व्याप्त समस्या र चुनौतीहरूबारे जानकारी लिएका छन् र समाधानका लागि ठोस योजना अघि बढाउने प्रतिबद्धता व्यक्त गरे।
सर्राफले शिक्षा, स्वास्थ्य, सडक र सरसफाइ व्यवस्थापन लगायतका आधारभूत पूर्वाधार विकासलाई प्राथमिकतामा राख्ने योजना रहेको बताए। साथै, स्थानीय युवालाई रोजगारी सिर्जना गर्ने कार्यक्रम ल्याउने र मुर्ली क्षेत्रको समग्र विकासका लागि संघीय तथा प्रदेश सरकारसँग समन्वय गर्दै बजेट विनियोजन सुनिश्चित गर्ने लक्ष्य रहेको उनले बताए।
कार्यक्रममा स्थानीय नेता, बुद्धिजीवी, विद्यार्थी तथा पार्टीका कार्यकर्ता र समर्थकहरूको उल्लेखनीय उपस्थितिले उम्मेदवारप्रति व्यापक विश्वास र समर्थन देखाएको थियो। स्थानीयबासीहरूले सर्राफसँग प्रत्यक्ष संवाद गर्न पाउँदा खुशी व्यक्त गर्दै आगामी निर्वाचनमा पूर्ण साथ र समर्थन दिने प्रतिबद्धता जनाएका थिए।
उम्मेदवार सर्राफको सक्रिय घरदैलो अभियानले पर्सा–१ मा जनमत पार्टीको उपस्थितिलाई थप मजबुत बनाएको र मतदातामा सकारात्मक सन्देश प्रवाह गरेको विश्लेषकहरूले बताएका छन्।
