वीरगंज । नेपाल कम्युनिष्ट पार्टी (एमाले)की पर्सा निर्वाचन क्षेत्र नम्बर–२ अन्तर्गत प्रतिनिधिसभा सदस्य उम्मेदवार रीमा कुमारी यादवले मंगलबार वीरगंज महानगरपालिकाकाे वडा नं.–९ र १० मा घरदैलो कार्यक्रम सञ्चालन गरेकी छन्।
घरदैलोका क्रममा उम्मेदवार यादवले स्थानीय मतदातासँग प्रत्यक्ष भेटघाट गर्दै जनताको समस्या, सुझाव र अपेक्षा सुन्दै विकासका ठोस प्रतिबद्धता व्यक्त गरिन्। आगामी फागुन २१ गते हुने निर्वाचनमा सूर्य चिन्हमा मतदान गरी आफूलाई विजयी गराउन उनले मतदातासँग आग्रह गरिन्।
कार्यक्रमका क्रममा स्थानीय बासिन्दाले सडक स्तरोन्नति, ढल निकास, खानेपानी, स्वास्थ्य सेवा, विद्यालयको गुणस्तर सुधार, रोजगारीका अवसर तथा युवाका लागि खेलकुद पूर्वाधार निर्माणजस्ता आधारभूत आवश्यकतामा ध्यानाकर्षण गराएका थिए। त्यसको जवाफमा यादवले ती मागहरूलाई प्राथमिकताका साथ सम्बोधन गर्ने प्रतिबद्धता जनाउँदै भनिन्, “जनताको घरदैलोमै पुगेर समस्या बुझ्नु नै हाम्रो पहिलो कर्तव्य हो। तपाईंहरूको विश्वासले जितेपछि विकासलाई व्यवहारमै उतार्नेछौं।”
घरदैलो कार्यक्रमका क्रममा स्थानीयले उम्मेदवार यादव र उनको टोलीलाई फूलमाला तथा खादा लगाएर स्वागत गरेका थिए। धेरै स्थानमा महिलाहरू र युवाहरूको उत्साहजनक सहभागिता देखिएको थियो।
घरदैलो कार्यक्रममा एमालेका केन्द्रीय सदस्य प्रभु हजरा, विजय सरावगी, मधेश प्रदेश उपाध्यक्ष बिचारी यादव, नेता मनोज कुशवाहा, अजय गुप्ता, अंगद गुप्ता लगायत स्थानीय नेता–कार्यकर्ता तथा समर्थकहरूको उल्लेख्य सहभागिता रहेको थियो।
