वीरगंज । पर्सा क्षेत्र नम्बर–४ का नेपाली कांग्रेस उम्मेदवार रमेश रिजालले सोमबार ठोरी गाउँपालिका वडा नम्बर–४ मा घरदैलो कार्यक्रम सम्पन्न गरेका छन्।
उम्मेदवार रिजालले वडा नम्बर ४ अन्तर्गत विजयबस्ती, निर्मलबस्ती, मालीटोल र शिकारीबासमा पुगेर स्थानीय मतदातासँग भेटघाट गर्दै प्रत्यक्ष संवाद गरेका थिए। घरदैलोका क्रममा उनले जनताका समस्या, आवश्यकता तथा सुझावहरू सुन्दै विजयी भएपछि ती मुद्दालाई प्राथमिकताका साथ सम्बोधन गर्ने प्रतिबद्धता व्यक्त गरे।
स्थानीय बासिन्दाले विकास निर्माण, सडक पूर्वाधार, शिक्षा तथा स्वास्थ्य सेवासम्बन्धी समस्या उठाउँदै समाधानका लागि प्रभावकारी पहल गर्न आग्रह गरेका थिए। रिजालले आफू विगतदेखि नै जनतासँग नजिक रहेर काम गर्दै आएको उल्लेख गर्दै आगामी दिनमा पनि जनताको सेवामा समर्पित रहने बताए।
घरदैलोका क्रममा स्थानीयहरूले उम्मेदवार रिजालको भव्य स्वागत गरेका थिए। कार्यक्रममा नेपाली कांग्रेस मधेश प्रदेशका महामन्त्री बृहस्पती कृष्ण श्रेष्ठ, मधेश प्रदेशका वन तथा वातावरण मन्त्री शंकर चौधरी, क्षेत्रीय सभापति श्रीकान्त प्रसाद यादव, जिवन सापकोटा लगायत स्थानीय नेता तथा कार्यकर्ताहरूको सहभागिता रहेको थियो।
