वीरगंज । जनमत पार्टीका तर्फबाट पर्सा निर्वाचन क्षेत्र नम्बर–१ का प्रतिनिधिसभा सदस्य उम्मेदवार ओमप्रकाश सरार्फले वीरगञ्ज महानगरपालिका वडा नम्बर–२ मा घरदैलो कार्यक्रम सम्पन्न गरेका छन्। अभियानका क्रममा उनले स्थानीय बासिन्दासँग भेटघाट गर्दै क्षेत्रका समस्या, चुनौती र सम्भावनाबारे जानकारी लिएका हुन्।
घरदैलोका क्रममा सरार्फले वडा नम्बर–२ मा देखिएको खानेपानीको समस्या प्रमुख सरोकारको विषय भएको बताए। स्थानीयवासीहरूले शुद्ध खानेपानीको अभावबारे गुनासो गरेपछि उनले स्थायी पाइपलाइन विस्तार, पानी ट्यांकी निर्माण र आधुनिक प्रविधिको प्रयोगमार्फत दीर्घकालीन समाधानका लागि पहल गर्ने प्रतिबद्धता व्यक्त गरे।
त्यसैगरी, सडक तथा ढल व्यवस्थापन सुधारलाई पनि प्राथमिकतामा राख्ने उनले बताए। वर्षायाममा हिलाम्मे सडक र अव्यवस्थित ढल निकासका कारण स्थानीयले सास्ती खेप्दै आएको भन्दै सरार्फले गुणस्तरीय सडक निर्माण, ढल व्यवस्थापन र नियमित सरसफाइ कार्यक्रम सञ्चालन गरिने उल्लेख गरे। विकास निर्माणका काममा स्थानीय तह र संघीय सरकारबीच प्रभावकारी समन्वय गरिने उनको भनाइ थियो।
भेटघाटका क्रममा भूमिसम्बन्धी समस्या, सार्वजनिक जग्गा संरक्षण र अतिक्रमण रोकथामका विषय पनि उठेका थिए। सरार्फले पारदर्शी प्रशासनिक प्रणालीमार्फत यस्ता विवाद समाधान गर्ने र सार्वजनिक सम्पत्तिको संरक्षणमा कडाइ गरिने बताए।
युवाहरूका लागि रोजगारी सिर्जना, सीपमूलक तालिम र उद्यमशीलता प्रवर्द्धन आफ्नो प्रमुख एजेन्डा रहेको उनले दोहोर्याए। स्थानीय स्तरमै उद्योग, साना व्यवसाय र स्वरोजगार कार्यक्रमलाई प्रोत्साहन गरिने उनको प्रतिबद्धता थियो। साथै, स्वास्थ्य चौकी स्तरोन्नति, औषधि आपूर्ति व्यवस्थापन तथा गुणस्तरीय शैक्षिक वातावरण निर्माणमा पहल गरिने उनले बताए।
घरदैलो कार्यक्रममा स्थानीय युवादेखि ज्येष्ठ नागरिकसम्मको उल्लेखनीय सहभागिता रहेको थियो। सरार्फले आफ्नो अभियान केवल चुनाव केन्द्रित नभई दीर्घकालीन विकास, सुशासन र जवाफदेहितामा आधारित रहेको बताए।
