वीरगंज । गौतम स्कुल वीरगंज द्वारा आयोजित “शाइनिङ स्टार्स–२०८२” कार्यक्रम शनिबार भव्य रूपमा सम्पन्न भएको छ। विद्यालयकी निर्देशिका परीक्षा पिया लामाको अध्यक्षतामा भएको कार्यक्रमको उद्घाटन ईसीईसीका सहायक विभाग प्रमुख सुमिन महर्जन ले गरेका थिए।
कार्यक्रमलाई सम्बोधन गर्दै महर्जनले आजका नानीबाबु भोलिको भविष्य भएको उल्लेख गर्दै अभिभावकले बालबालिकाको समग्र विकासमा विशेष ध्यान दिनुपर्ने बताए। उनले शिक्षा केवल पाठ्यपुस्तकमै सीमित नहुने धारणा राख्दै यस्ता सह–पाठ्यक्रम तथा अतिरिक्त क्रियाकलापले बालबालिकाको व्यक्तित्व विकासमा महत्वपूर्ण भूमिका खेल्ने बताए। अनुशासन, निरन्तर अभ्यास र सकारात्मक सोचका साथ अघि बढ्न उनले विद्यार्थीहरूलाई प्रेरित गरे।
अन्य वक्ताहरूले पनि विद्यार्थीहरूको सर्वाङ्गीण विकासका लागि अतिरिक्त क्रियाकलाप अपरिहार्य रहेको धारणा व्यक्त गरे। यस्ता कार्यक्रमले आत्मविश्वास वृद्धि गर्नुका साथै अन्तरनिहित प्रतिभा उजागर गर्न मद्दत पुग्ने उनीहरूको भनाइ थियो।
कार्यक्रमको तेस्रो दिन यूकेजी कक्षाका विद्यार्थीहरूको दीक्षान्त समारोह विशेष आकर्षण बनेको थियो। साना विद्यार्थीहरूले दीक्षान्त टोपी र प्रमाणपत्रसहित नयाँ शैक्षिक यात्रातर्फ अघि बढ्ने प्रतिबद्धता जनाउँदै खुसीयाली साटासाट गरेका थिए।
कार्यक्रममा विद्यार्थीहरूले नृत्य, गायन, कविता वाचन, नाटक तथा विविध सांस्कृतिक प्रस्तुति मार्फत आफ्नो कला र क्षमता प्रदर्शन गरेका थिए। रंगीन पोशाक, आकर्षक मञ्च सजावट र सजीव सांस्कृतिक वातावरणले कार्यक्रमलाई अझ विशेष बनाएको थियो। आत्मविश्वासपूर्ण प्रस्तुति र अनुशासित सहभागिताले उपस्थित अभिभावक तथा अतिथिहरूलाई मन्त्रमुग्ध बनाएको जनाइएको छ।
कार्यक्रममा विद्यालयका निर्देशक सोनम लामा, रुङ्गटा ग्रुप अफ इन्डस्ट्रिजका निर्देशक नारायण रुङ्गटा, नेपाल मेडिसिटी अस्पताल का अस्थिरोग विशेषज्ञ डा. रञ्जन झा, स्नायु शल्यचिकित्सक डा. फिरोज अफजल, ग्रीन सिटी सामुदायिक प्रहरी आदर्शनगरका अध्यक्ष जयप्रकाश खेतान, विद्यालयका प्रिन्सिपल गणेश क्षेत्री लगायतको उल्लेखनीय उपस्थिति रहेको थियो।
विद्यालय प्राङ्गणमा सम्पन्न कार्यक्रमको सञ्चालन संयोजक सौराज प्रधानले गरेका थिए। समग्रमा “शाइनिङ स्टार्स–२०८२” ले विद्यार्थीहरूको प्रतिभा प्रस्फुटनका साथै विद्यालय र अभिभावकबीचको सम्बन्ध सुदृढ बनाउन सफल भएको विद्यालय प्रशासनले जनाएको छ।
