वीरगंज । पर्सा निर्वाचन क्षेत्र नम्बर १ अन्तर्गत पर्ने वीरगंज महानगरपालिका वडा नम्बर २३ का जसपाका वडा इकाई कमिटी अध्यक्षसहित २५० भन्दा बढी स्थानीय नेता–कार्यकर्ता नेकपा एमालेमा प्रवेश गरेका छन्।
शुक्रबार बिहान प्रसौनीमा आयोजित पार्टी प्रवेश तथा वडा भेलामा जसपाका वडा इकाई कमिटी अध्यक्ष जमुना यादव, सचिव मनोज कुमार यादव तथा स्थानीय नेता नन्दु किशोर यादव, कालिम अन्सारी, जयराम साह गोढ, जगरनाथ महतो, कृष्णा कुशवाह, रुदल सहनी र श्याम किशोर यादवलगायत नेता–कार्यकर्ताले एमाले रोजेका हुन् ।
कार्यक्रममा नवप्रवेशीहरूलाई पर्सा–१ का एमाले उम्मेदवार प्रदीप यादवले अबीर टीका लगाएर स्वागत गर्दै वडा नम्बर २३ मा एमाले थप सशक्त बनेको दाबी गरे । उनले ‘जेनजी आन्दोलन’ पश्चात देश र संविधानको रक्षा गर्न सक्ने एकमात्र शक्ति एमाले भएको जिकिर गरे। मधेस आन्दोलनबाट प्राप्त संघीयता र समावेशीताजस्ता उपलब्धिको संरक्षण एमालेले नै गर्न सक्ने विश्वासका आधारमा आफूले उम्मेदवारी दिएको पनि उनले बताए।
यादवले पर्सा–१ मा प्रतिस्पर्धामा रहेका अन्य उम्मेदवारहरूमाथि कटाक्ष गर्दै जनतासँग जोडिएका नेतृत्वको अभाव रहेको टिप्पणी गरे। “कोही बाहिरका जिल्लाबाट आएका होटल व्यवसायी छन्, कोही उद्योगपति। ती उम्मेदवारहरू जनताको दुःख–सुखमा कहिल्यै देखिएनन्, चुनावका बेला मात्र भोट माग्न आउँछन्,” उनले भने।
उनले कोरोना महामारी तथा खानेपानी संकटजस्ता विपत्तिका बेला जनतासँगै खटिएको नेतृत्वको मूल्यांकन गरी फागुन २१ को निर्वाचनमा मतदान गर्न मतदातासँग अपिल गरे।
एमाले वडा कमिटी अध्यक्ष लालबाबु यादवको अध्यक्षतामा सम्पन्न कार्यक्रममा केन्द्रिय सदस्य तथा पर्सा इन्चार्ज प्रभु हजरा, केन्द्रिय सदस्य निर्मला देवकोटा, मधेस प्रदेश उपाध्यक्ष विचारी यादव, वडाध्यक्ष अवध कुशवाहालगायतको उपस्थिति रहेको थियो।
