वीरगंज। नेकपा (एमाले) का नेता तथा वीरगंजका मेडिकल व्यवसायी बसरुद्दीन अन्सारी नेपाली काँग्रेसमा औपचारिक रूपमा प्रवेश गरेका छन्। जनकपुरमा आयोजित काँग्रेसको प्रतिज्ञा सभामा काँग्रेस सभापति गगन थापाले अन्सारीलाई खादा तथा मालाले स्वागत गर्दै पार्टीमा भित्र्याएका हुन्।
अन्सारी लामो समयदेखि विभिन्न राजनीतिक धारमा सक्रिय रहँदै आएका नेता हुन्। उनले राजावादी, माओवादी हुँदै एमालेसम्मको यात्रा तय गर्दै पटक–पटक चुनाव लडेका थिए। स्थानीय तह निर्वाचन २०७४ अघि एमाले प्रवेश गरेका अन्सारी त्यसपछि पार्टीको केन्द्रीय सदस्य पदका आकाङ्क्षी बनेका थिए, तर ११औँ महाधिवेशनमा पराजित भएका थिए।
हालै सम्पन्न निर्वाचनमा प्रतिनिधिसभा सदस्य पदका लागि एमालेबाट टिकटको अपेक्षा राखेका अन्सारीले टिकट नपाएपछि काँग्रेस रोजेको निकट स्रोतहरूले बताएका छन्। उनले आफ्ना केही सहयोगीहरूलाई पनि टिकट दिलाउने प्रयास गरेका थिए, तर सफल हुन सकेनन्।
पार्टी प्रवेशपछि अन्सारीले समावेशी, लोकतान्त्रिक र विकासमुखी राजनीतिप्रति प्रतिबद्धता व्यक्त गर्दै पर्सा क्षेत्रको समृद्धि, स्थायित्व तथा दिगो विकासका लागि आफ्नो अनुभव र ऊर्जा समर्पित गर्ने बताएका छन्।
कार्यक्रमलाई सम्बोधन गर्दै सभापति गगन थापाले अन्सारीको प्रवेशले पर्सा जिल्लामा काँग्रेसको सङ्गठन थप सशक्त बनेको उल्लेख गरे। उनले देशको परिवर्तनका लागि वैकल्पिक सोच, पारदर्शिता र इमानदार नेतृत्व आवश्यक रहेको बताउँदै अनुभवी नेताहरूको साथले पार्टी अझ बलियो बन्ने धारणा राखे।
