वीरगंज । पर्सा निर्वाचन क्षेत्र नं. ४ अन्तर्गत जिराभवानी गाउँपालिकाका मुकेश पटेल नेकपा एमाले परित्याग गरी नेपाली कांग्रेसमा प्रवेश गरेका छन् । पटेलसहित एक सयभन्दा बढी नेता–कार्यकर्ता कांग्रेसमा समाहित भएको क्षेत्रीय सभापति श्रीकान्त प्रसाद यादवले जानकारी दिए । नवप्रवेशीहरूलाई कांग्रेसका उम्मेदवार रमेश रिजालले पार्टीमा स्वागत गरेका थिए।
यसैगरी कांग्रेस प्रवेश गर्नेमा जगरनाथपुर गाउँपालिका वडा नं. ५ का धर्मेन्दर यादव, शम्भु यादवलगायतका रहेका छन् । स्थानीय तहमा विभिन्न दलका नेता–कार्यकर्ताको कांग्रेसप्रति आकर्षण बढ्दै गएको दाबी कांग्रेसले गरेको छ ।
यसअघि शुक्रबार बिहान लोकतान्त्रिक समाजवादी पार्टी (लोसपा) पर्साका जिल्ला अध्यक्ष रामचन्द्र पंडित तथा नेता चन्द्रिका सोनार पनि नेपाली कांग्रेसमा प्रवेश गरेका थिए। उनीहरूलाई कांग्रेस नेता एवं पर्सा–४ का उम्मेदवार रमेश रिजालले आफ्नै निवासमा टीका तथा अबीर लगाएर स्वागत गरेका हुन्।
पंडित र सोनारसहित करिब १५० भन्दा बढी समर्थक तथा लोसपाका नेता–कार्यकर्ताहरू कांग्रेसमा समाहित भएको बताइएको छ। यस प्रवेशसँगै पर्सा निर्वाचन क्षेत्र नं. ४ मा पार्टी थप बलियो बनेको उम्मेदवार रिजालले दाबी गरे।
