वीरगंज । वीरगंज महानगरपालिका–१० आदर्शनगरस्थित एक गोदाममा छापामारीका क्रममा प्रहरी टोलीमाथि आक्रमण भएको घटनामा संलग्न दुई भारतीय नागरिकसहित ६ जनालाई प्रहरीले पक्राउ गरेको छ । पक्राउ परेकाविरुद्ध ज्यान मार्ने उद्योग तथा आपराधिक उपद्रव आरोपमा मुद्दा दर्ता गरिएको प्रहरीले जनाएको छ ।
पक्राउ पर्नेमा वीरगंज–१० घडिअर्वाका ४६ वर्षीय प्रमोद कुमार कानु, २० वर्षीय कुन्जन सर्राफ, वीरगंज–१ छप्कैयाका ३८ वर्षीय दिपराज सहनी मलाह, भारत मोतीहारी रक्सौलका ४० वर्षीय प्रभु महतो, भारत भागलपुरका ३५ वर्षीय पृतम कुमार चौधरी तथा पर्सा विन्दवासिनी गाउँपालिका–५ का ५५ वर्षीय श्रीचन्द्र प्रसाद साह रहेका छन्।
जिल्ला प्रहरी कार्यालय पर्साका अनुसार भन्सार छली गरी भित्र्याइएका सामानहरू अनाधिकृत रूपमा भण्डारण गरिएको भन्ने सूचनाको आधारमा सशस्त्र प्रहरी बल र वीरगंज भन्सार कार्यालयका प्रतिनिधिसहितको संयुक्त टोली उक्त गोदाममा पुगेको थियो । सो क्रममा टोलीमाथि ढुंगा–मुडा प्रहार हुनुका साथै सवारी साधन तोडफोड गरिएको प्रहरीले जनाएको छ।
घटनामा ३ जना सशस्त्र प्रहरी घाइते भएका थिए । आक्रमणका क्रममा सशस्त्र प्रहरीका दुई वटा गाडीमा तोडफोडसमेत भएको थियाे ।
घटनामा संलग्न रहेको आरोपमा नियन्त्रणमा लिइएका व्यक्तिहरूलाई पर्सा जिल्ला अदालतबाट ७ दिन म्याद थप अनुमति लिई थप अनुसन्धान भइरहेको जिल्ला प्रहरी कार्यालय पर्साका प्रवक्ता प्रहरी नायब उपरीक्षक हरि बहादुर बस्नेतले जानकारी दिए।
