वीरगंज । वीरगंज महानगरपालिका वडा नम्बर १० आदर्शनगरस्थित एक ट्रान्सपोर्ट गोदाममा छापा मार्न पुगेको सशस्त्र प्रहरीको टोलीमाथि व्यपारीहरुले आक्रमण गरेका छन् । घटनामा ३ जना सशस्त्र प्रहरी घाइते भएका छन् भने प्रहरीको एउटा गाडीको शीशा पनि फुटेको छ ।
सोमबार बिहान सशस्त्र प्रहरी नायब उपरीक्षक विकास अधिकारीको नेतृत्वमा प्रस्तावित सीमा सुरक्षा बल, वीरगंज भन्सारको टोली राजश्व छली भित्र्याइएको सामान गोदाममा भण्डारण गरिएको सूचनाका आधारमा आदर्शनगर पुगेको थियो । विनोद साह कानुको सञ्चालनमा रहेको ‘सबिता ट्रेडर्स’को गोदाममा खानतलासी गर्ने क्रममा विवाद सुरु भएको बताइएको छ ।
सशस्त्र प्रहरीका अनुसार गोदाममा खानतलासीको प्रक्रिया सुरु गर्न खोज्दा त्यहाँ उपस्थित व्यपारीहरुले बिलबिजक भएको दाबी गर्दै विरोध जनाएका थिए । विवाद बढ्दै जाँदा सशस्त्र प्रहरीले गोदामको ताला फुटाउन खोजेपछि अवस्था तनावग्रस्त बनेको थियो । त्यसपछि व्यपारीहरुको एक समूहले सशस्त्र प्रहरी र उनीहरु सवार दुई वटा गाडीमाथि ढुंगा तथा बाँसको फाटा प्रहार गरेको जनाइएको छ । आक्रमणपछि सशस्त्र प्रहरीको टोली गाडी लिएर घटनास्थलबाट फर्किएको थियो ।
सशस्त्र प्रहरी नायब उपरीक्षक विकास अधिकारीले गोदामको खानतलासीका क्रममा आक्रमण हुँदा ३ जना सुरक्षाकर्मी घाइते भएको र उनीहरुको उपचार भइरहेको जानकारी दिए । उनका अनुसार घटनास्थलबाट करिब ७ लाख रुपैयाँ बराबरको सामान नियन्त्रणमा लिइएको छ भने घटनाबारे थप अनुसन्धान भइरहेको छ । खानतलासी गरिएको गोदाम रहेको घर मदन गुप्ताको भए पनि गोदाम सञ्चालकको नाम खुलेको छैन ।
यता, आदर्शनगरका ट्रान्सपोर्ट व्यपारीहरुले भने सशस्त्र प्रहरीले पटक–पटक बिना प्रक्रिया गोदाममा छापा मार्ने, बिलबिजक भएका सामानसमेत उठाएर लैजाने गरेको आरोप लगाएका छन् ।
व्यपारीहरुले गोदाममा खानतलासी गर्ने अधिकार राजश्व अनुसन्धान कार्यालयसँग मात्रै रहेको दाबी गर्दै सशस्त्र प्रहरीले बारम्बार ताला फुटाएर छापा मार्नु गलत भएको बताएका छन् । यही असन्तुष्टिका कारण सोमबारको घटना घटेको उनीहरुको भनाइ छ ।
घटनापछि आदर्शनगर क्षेत्रमा केही समय तनावको अवस्था सिर्जना भएको थियो । अहिले अवस्था सामान्य रहेको र घटनाबारे दुवै पक्षबाट छानबिन भइरहेको बताइएको छ ।
