वीरगंज । आगामी २०८२ फागुन २१ गते हुने प्रतिनिधि सभा सदस्यको निर्वाचन स्वच्छ, निष्पक्ष र भयरहित बनाउन पर्सा जिल्लामा निर्वाचन आचारसंहिता अनुगमन अधिकृतहरू नियुक्त गरिएको छ।
जिल्ला प्रशासन कार्यालय, पर्साले एक सूचना जारी गर्दै निर्वाचन ऐन २०७३ र निर्वाचन आचारसंहिता २०८२ बमोजिम दुई जना अधिकृतहरू जिम्मेवारीमा नियुक्त भएको जानकारी दिएको छ। निर्वाचन आचारसंहिता विपरीतका कार्य भए/नभएको अनुगमन गर्न र उजुरी लिन सहायक प्रमुख जिल्ला अधिकारी विनोद कुमार पोखरेल र प्र.को.नि. मनोज कुमार जोशीलाई जिम्मेवारी तोकिएको छ।
सहायक प्रमुख जिल्ला अधिकारी सुमन कुमार कार्कीद्वारा हस्ताक्षरित सूचना अनुसार यदि कसैले निर्वाचन आचारसंहिता विपरीतका कार्य गरे वा गराएमा इच्छुक व्यक्तिले अनुसूची–४ बमोजिम उजुरी दर्ता गर्न सक्नेछन् । प्रशासनले निर्वाचनलाई मर्यादित बनाउने जिम्मेवारीमा नागरिकहरूको सक्रिय सहभागिता र निगरानी आवश्यक भएको उल्लेख गरेको छ।
