वीरगंज । वीरगंजको चिरपरिचित कोहिनुर बचत तथा ऋण सहकारी संस्था लि. ले राष्ट्रिय सहकारी नियमन प्राधिकरणबाट विधिवत सञ्चालन इजाजतपत्र प्राप्त गरेको छ। यससँगै संस्थाले कर्जा सूचना केन्द्र (CIC) मा समेत सदस्यता प्राप्त गर्दै कानुनी रूपमा आफ्नो बचत तथा ऋण कारोबारलाई थप व्यवस्थित र पारदर्शी बनाएको छ।
सहकारी ऐन, २०७४ को दफा ८१ तथा बचत तथा ऋणको कारोबार गर्ने सहकारी संस्थाको दर्ता तथा अभिलेखीकरण मापदण्ड, २०८२ को दफा ४ बमोजिम संस्थाले प्राधिकरणमा दर्ता भई सञ्चालन अनुमति प्राप्त गरेको हो । साथै, प्रचलित कानुनअनुसार स्थापना भएको कर्जा सूचना केन्द्रमा आवद्ध भएसँगै संस्थाको ऋण व्यवस्थापन प्रणाली थप सुदृढ भएको जनाइएको छ ।
संस्थाका व्यवस्थापक प्रदीप कुमार लोहारले इजाजतपत्र र कर्जा सूचना केन्द्रको आवद्धताले सहकारीको वित्तीय अनुशासनलाई मजबुत बनाएको बताउनुभयो । उहाँका अनुसार अब ऋण लगानी गर्दा सदस्यहरू अन्य कुनै बैंक तथा वित्तीय संस्थामा कालो सूचीमा परे/नपरेको तथा उनीहरूको कर्जाको अवस्था सहजै यकिन गर्न सकिनेछ ।
सहकारी नियमावली, २०७५ को व्यवस्था अनुरूप कर्जा सूचना केन्द्रमा आवद्ध हुनुले खराब कर्जाको जोखिम न्यूनीकरण गर्दै संस्थाको लगानीलाई थप सुरक्षित बनाउने विश्वास संस्थाले लिएको छ। यसले सदस्यहरूलाई अझ भरपर्दो, पारदर्शी र प्रभावकारी वित्तीय सेवा उपलब्ध गराउन सहयोग पुग्ने अपेक्षा गरिएको छ।
