वीरगंज । पर्सा क्षेत्र नं. ४ बाट नेकपा (माओवादी केन्द्र)का प्रतिनिधि सभा सदस्य पदका उम्मेदवार जयप्रकाश थारुको प्रचार–प्रसारका लागि जगरनाथपुर गाउँपालिका वडा नं. ३ खलुचडीमा निर्वाचन प्रचार–प्रसार तथा परिचालन समिति गठन गरिएको छ।
शरीफ गद्दीको संयोजकत्वमा ३१ सदस्यीय समिति गठन गरिएको नेकपाले जनाएको छ । आगामी फागुन २१ गतेकाे निर्वाचनमा उम्मेदवार थारुलाई विजयी गराउने उद्देश्यले समिति गठन गरिएको प्रचार–प्रसार समिति संयोजक गद्दीले जानकारी दिए।
समिति गठन कार्यक्रममा नेकपाका केन्द्रीय सदस्य नागेन्द्र चौधरी, बालगोपाल थापा, गंगा खड्का, नेता बलिराम साह लगायतका वक्ताहरूले सम्बोधन गर्दै यस क्षेत्रको विकास र परिवर्तनका लागि नेकपाको कुनै विकल्प नरहेको बताएका थिए।
वक्ताहरूले पार्टी सधैं जनताको पक्षमा उभिँदै समाजवादी परिवर्तनको अभियानलाई अघि बढाउँदै आएको उल्लेख गर्दै उम्मेदवार थारुलाई विजयी गराउन सबैलाई सक्रिय रूपमा लाग्न आग्रह गरे ।
कार्यक्रममा स्थानीय नेता–कार्यकर्ता तथा समर्थकहरूको उल्लेखनीय उपस्थिति रहेको थियो ।
