वीरगंज । वीरगंज महानगरपालिका वडा नम्बर २ का पूर्व वडाध्यक्ष शेख अब्बास नेकपा (एमाले) मा प्रवेश गरेका छन्। २०७४ सालको स्थानीय तह निर्वाचनमा तत्कालीन संघीय समाजवादी फोरम नेपाल (हालको जसपा नेपाल) बाट निर्वाचित अब्बासले आइतबार औपचारिक रूपमा जसपा नेपाल परित्याग गर्दै एमाले प्रवेश गरेका हुन्।
वीरगंज–२ स्थित छपकैयामा आइतबार बिहान आयोजित एमालेको पार्टी प्रवेश कार्यक्रममा पर्सा निर्वाचन क्षेत्र नम्बर २ का एमाले उम्मेदवार तथा पूर्वमन्त्री प्रदीप यादवले अब्बाससहित नवप्रवेशीहरुलाई पार्टीमा स्वागत गरे।
कार्यक्रमलाई सम्बोधन गर्दै एमाले उम्मेदवार यादवले आफू सधैं जनताको सुख–दुःखमा साथ दिँदै आएको दाबी गरे। उनले भने, “अहिले चुनाव नजिकिँदै गर्दा भोट माग्न धेरै नेताहरू रुप फेरेर जनताकहाँ आइरहेका छन्। तर खानेपानीको संकट हुँदा र हैजाको महामारी फैलिँदा उनीहरू कहाँ थिए? त्यसबेला जनताको बीचमा यही प्रदीप यादव थियो।”
यादवले देश जलाउने कि देश जोगाउने शक्तिलाई भोट दिने भन्ने निर्णयको घडी आएको उल्लेख गर्दै देश बनाउने नेतृत्वलाई नै जनताले आफ्नो प्रतिनिधि बनाउनुपर्नेमा जोड दिए।
कार्यक्रममा नेकपा एमालेकी केन्द्रीय सदस्य निर्मला देवकोटा, जिल्ला सचिव महेस दास, क्षेत्रीय संयोजक मानदेव हजरा, नेता सुन्दर कुर्मी लगायतको उल्लेखनीय सहभागिता रहेको थियो।
