वीरगंज । नेपाली कम्युनिष्ट पार्टी (नेकपा) वीरगंज महानगरपालिका वडा नम्बर–२७ को वडा भेला बिहीबार टोल घुर्मिमा सम्पन्न भएको छ। आगामी निर्वाचनलाई लक्षित गर्दै आयोजित भेलाले पार्टीको संगठन सुदृढीकरण र चुनावी तयारीलाई तीव्र बनाएको छ।
भेलालाई सम्बोधन गर्दै नेकपाका केन्द्रीय सदस्य तथा पर्सा प्रतिनिधिसभा निर्वाचन क्षेत्र नम्बर–२ का उम्मेदवार मनोज चौधरीले यसपटकको निर्वाचनमा नेकपाको जित सुनिश्चित रहेको दाबी गर्नुभयो । उहाँले जनताको हितमा आधारित नीति, संगठनात्मक एकता र कार्यकर्ताको सक्रियताका कारण नेकपालाई जितको विकल्प नभएको बताउनुभयो।
अकलु यादवको अध्यक्षतामा सम्पन्न भेलामा पार्टीका केन्द्रीय सदस्य किशोरी कुशवाहा, बृजलाल पासवान, विपिन यादव र बिरेन्द्र यादव लगायतका नेताहरूले आ–आफ्नो मन्तव्य व्यक्त गर्दै पार्टीलाई जिततर्फ अग्रसर गराउन सबै एकताबद्ध भएर लाग्नुपर्नेमा जोड दिएका थिए।
भेलाले अकलु यादवको संयोजकत्वमा १०१ सदस्यीय निर्वाचन परिचालन कमिटी गठन गरेको छ। उक्त कमिटीको सह–संयोजकमा मनोज कर्ण चयन हुनु भएको छ। नवगठित कमिटीले वडा तहमा पार्टीको संगठन विस्तार, मतदाता परिचालन र चुनावी अभियानलाई प्रभावकारी रूपमा अघि बढाउने निर्णय समेत गरेको छ।
