वीरगंज । पर्सा क्षेत्र नम्बर–४ का नेपाली कांग्रेसका उम्मेदवार रमेश रिजालले छिपहरमाई गाउँपालिका वडा नम्बर–२ मा मंगलबार घरदैलो तथा मतदाता भेटघाट कार्यक्रमलाई निरन्तरता दिएका छन्।
पूर्वमन्त्री एवं निर्वतमान सांसदसमेत रहेका उम्मेदवार रिजालले घरदैलोका क्रममा मतदातासँग प्रत्यक्ष भेटघाट गर्दै यसपटकको निर्वाचनमा आफुलाई अन्तिम पटक सहयाेग गर्न आग्रह गरे । देश अहिले विषम परिस्थितिमा रहेको उल्लेख गर्दै उनले संकटका बेला कांग्रेसले नै सधैं निकास दिएको इतिहास रहेको स्मरण गराए।
उनले लोकतन्त्रको रक्षा, स्थायित्व र विकासका लागि नेपाली कांग्रेसको जित अनिवार्य रहेको बताउँदै मतदातालाई सचेत निर्णय लिन आग्रह गरे । स्थानीय विकास, सेवा प्रवाह र जनताका समस्या समाधानमा कांग्रेस प्रतिबद्ध रहेको उनको भनाइ थियो।
घरदैलो तथा मतदाता भेटघाट कार्यक्रममा नेपाली कांग्रेस पर्साका प्रवक्ता रमेश पाण्डे, सह–सचिव नवीन सिंह, क्षेत्रीय सभापति श्रीकान्त यादव, प्रदेश क्षेत्रीय सभापति दिपेन्द्र सिंहलगायत छिपहरमाईका स्थानीय नेता तथा कार्यकर्ताहरूको उल्लेखनीय उपस्थिति रहेको थियो।
कार्यक्रमका क्रममा स्थानीयवासीहरूले शिक्षा, स्वास्थ्य, सडक तथा रोजगारीका विषयमा आफ्ना गुनासा र सुझावहरू राखेका थिए भने उम्मेदवार रिजालले तिनलाई प्राथमिकताका साथ सम्बोधन गर्ने प्रतिबद्धता व्यक्त गरेका थिए।
