वीरगंज । अशोक राई नेतृत्वको जनता समाजवादी पार्टी (जसपा) पर्साका अध्यक्ष तथा बहुदरमाई नगरपालिकाका प्रमुख सिंगासन साह तेली नेकपा एमालेमा प्रवेश गरेका छन्। मंगलबार आयोजित एमाले पर्साको जिल्लास्तरीय कार्यकर्ता भेला तथा पार्टी प्रवेश कार्यक्रममा उनलाई एमालेका उपाध्यक्ष रामबहादुर थापा ‘बादल’ले औपचारिक रूपमा पार्टीमा स्वागत गरेका हुन्।
एमाले पर्सा क्षेत्र नम्बर–१ का उम्मेदवार प्रदीप यादवका निकट मानिने तेली मंगलबार मात्र एमाले प्रवेश गरेका हुन्। यसअघि जसपाबाट निर्वाचित वीरगंज महानगरपालिकाका नगरप्रमुख राजेशमान सिंह पनि एमाले प्रवेश गरिसकेका थिए। यद्यपि, उनलाई पनि मंगलबारकै कार्यक्रममा उपाध्यक्ष बादलले पार्टीमा स्वागत गरेका थिए।
पूर्वमन्त्री एवं पर्सा १ का निर्वतमान सांसद प्रदीप यादव माघ ५ गते एमाले प्रवेश गरेपछि पार्टी अध्यक्ष केपी शर्मा ओलीसँगै वीरगंज महानगरपालिकाका नगरप्रमुख राजेशमान सिंहसमेत उपस्थित रहेका थिए । सोही राजनीतिक घटनाक्रमको निरन्तरताका रूपमा सिंगासन साह तेलीको एमाले प्रवेशलाई हेरिएको छ।
स्रोतका अनुसार बहुदरमाई नगरपालिकाका प्रमुख तेलीले आगामी स्थानीय तहको निर्वाचनमा एमालेबाट प्रमुखको टिकट पाउने आश्वासनपछि मात्र पार्टी प्रवेश गरेका हुन्। उनको प्रवेशसँगै पर्सा क्षेत्र नम्बर–२ मा पनि एमाले थप बलियो बनेको बताइएको छ । पर्सा क्षेत्र नम्बर–२ बाट एमालेकी उम्मेदवार रिमा कुमारी यादव रहेकी छन्।
पूर्वमन्त्री प्रदीप यादवले यसअघि जनता समाजवादी पार्टी नेपाल फुटाएर जनता समाजवादी पार्टी गठन गर्दा सिंगासन साह तेली र राजेशमान सिंह उनीसँगै थिए । पछिल्लो समय मधेशवादी राजनीतिबाट अलग हुँदै उनीहरू एमालेमा समाहित भएका हुन्, जसको उद्देश्य आगामी निर्वाचनमा जसरी पनि विजय सुनिश्चित गर्नु रहेको नेताहरूको भनाइ छ।
