वीरगंज । पर्सा निर्वाचन क्षेत्र नं. ४ अन्तर्गत ठोरी गाउँपालिकामा नेपाली काँग्रेसलाई ठूलो राजनीतिक झट्का लागेको छ । काँग्रेसका ठोरी गाउँपालिका सभापति सन्तोष श्रेष्ठले पार्टी परित्याग गर्दै राष्ट्रिय स्वतन्त्र पार्टी (रास्वपा) मा औपचारिक रूपमा प्रवेश गरेका छन् ।
सोमबार ठोरी गाउँपालिका वडा नं. ४ स्थित विजय बस्तीमा आयोजित रास्वपाको पार्टी प्रबेश कार्यक्रममा श्रेष्ठसहित विभिन्न दल परित्याग गरी करिब ३५० जना नेता तथा कार्यकर्ता पार्टीमा प्रवेश गरेकाे रास्वपा पर्सा क्षेत्र नं. ४ का सभापति जितेन्द्र मिश्रले जानकारी दिए ।
कार्यक्रममा रास्वपाका पर्सा क्षेत्र नं. ४ का उम्मेदवार टेकबहादुर शाक्य, केन्द्रीय सदस्य डा. नन्दन यादव, क्षेत्रीय सभापति जितेन्द्र मिश्र तथा ठोरी गाउँपालिका सभापति माधव बस्नेतलगायतका नेताहरूको उपस्थिति रहेको थियो । नवप्रवेशीहरूलाई अबीर–टीका लगाएर पार्टीमा स्वागत गरिएको थियो ।
पार्टी प्रवेशपछि बोल्दै सन्तोष श्रेष्ठले नेपाली काँग्रेस पुरातन सोच र यथास्थितिमा अल्झिएको आरोप लगाए । उनले पर्सा क्षेत्र नं. ४ मा २०४८ सालदेखि एउटै व्यक्तिलाई निरन्तर उम्मेदवार बनाइँदै आएको उल्लेख गर्दै नयाँ नेतृत्व र नयाँ अनुहारको मागलाई पार्टीले बेवास्ता गरेको बताए । यसकै कारण स्थानीय कार्यकर्ता र समर्थकहरूमा गहिरो असन्तोष रहेको उनको भनाइ थियो ।
श्रेष्ठले देशमा अब वास्तविक परिवर्तन आवश्यक भइसकेको र त्यसको नेतृत्व नयाँ सोच र युवालाई अवसर दिने दलले मात्र गर्न सक्ने धारणा राखे । “रास्वपाले युवालाई विश्वास गरेको छ, नयाँ सोचलाई प्राथमिकता दिएको छ, त्यसैले म यो पार्टीमा आएको हुँ,” उनले भने ।
कार्यक्रममा सहभागी नवप्रवेशीहरूले ठोरी र पर्सा क्षेत्र नं. ४ मा वैकल्पिक राजनीतिक शक्तिका रूपमा रास्वपालाई स्थापित गर्न संगठित रूपमा अघि बढ्ने प्रतिबद्धता व्यक्त गरेका थिए ।
