वीरगंज । नेपाली कांग्रेसका उम्मेदवार रमेश रिजालले आज पर्साको छिपहरमाई गाउँपालिका–५ भिस्वाबाट घरदैलो तथा मतदाता भेटघाट कार्यक्रम सुरु गरेका छन्।
घर–घर पुगेर मतदातासँग प्रत्यक्ष भेटघाट गर्दै उम्मेदवार रिजालले स्थानीयवासीका समस्या र सुझावहरू सुनेका थिए भने कांग्रेसका एजेन्डा तथा विकास योजनाबारे जानकारी गराएका थिए।
उनले शिक्षा, स्वास्थ्य, रोजगारी तथा आधारभूत पूर्वाधार विकासलाई प्राथमिकतामा राखेर काम गर्ने प्रतिबद्धता व्यक्त गर्दै जनताको भरोसा र सक्रिय समर्थनबाट मात्रै क्षेत्रको समग्र विकास सम्भव हुने बताए ।
स्थानीय मतदाताहरूले उम्मेदवार स्वयं गाउँमै आएर आफ्ना समस्या सुनेकोमा सकारात्मक प्रतिक्रिया व्यक्त गरेका छन्। पूर्व मन्त्री तथा निर्वतमान सांसदसमेत रहेका रिजालले आगामी दिनमा छिपहरमाई गाउँपालिकाका अन्य वडाहरूमा पनि घरदैलो र जनसम्पर्क कार्यक्रमलाई निरन्तरता दिने योजना रहेको जानकारी दिए।
घरदैलो तथा मतदाता भेटघाट कार्यक्रममा नेपाली कांग्रेस मधेस प्रदेशका महामन्त्री बृहस्पति कृष्ण श्रेष्ठ, पर्सा जिल्ला प्रवक्ता रमेश पाण्डे, सह–सचिव नवीन सिंह, क्षेत्रीय सभापति श्रीकान्त यादव, प्रदेश क्षेत्रीय सभापति दिपेन्द्र सिंहलगायत छिपहरमाईका स्थानीय नेता तथा कार्यकर्ताहरूको उल्लेखनीय उपस्थिति रहेको थियो।
