वीरगंज । पर्सा क्षेत्र नम्बर–२ का नेपाली कांग्रेसका उम्मेदवार अजयकुमार चौरसियाले “कांग्रेस हार्यो भने देश हार्छ” भन्दै लोकतन्त्र र राष्ट्रिय स्थिरताको रक्षा कांग्रेसबाट मात्रै सम्भव हुने दाबी गरेका छन्। स्वास्थ्य अवस्थाको प्रवाह नगरी लौरो टेकेरै चुनावी मैदानमा उत्रिएका चौरसियाले जनताको बीचमा पुगेर आक्रमक र भावनात्मक अपील गरेका हुन्।
खुट्टामा चोट लागेका कारण चिकित्सकले आराम गर्न सल्लाह दिए पनि पूर्व मन्त्री एवं निर्वतमान प्रतिनिधि सभा सदस्यसमेत रहेका चौरसिया वीरगंज महानगरपालिका वडा नम्बर–२६ मा बिहानैदेखि भेटघाट गर्दै मतदातासँग प्रत्यक्ष संवादमा जुटेका थिए।
उनले भने, “आज म लौरो टेकेर यहाँ आएको छु, तर देश लडखडिन नदिने जिम्मेवारीबाट पछि हटेको छैन। कांग्रेस कमजोर भयो भने लोकतन्त्र कमजोर हुन्छ। कांग्रेस हार्यो भने देश हार्छ।”
कांग्रेसको बलिदानी इतिहास स्मरण गराउँदै चौरसियाले देश संकटमा पर्दा कांग्रेस नै अग्रपंक्तिमा उभिएको दाबी गरे।
“जब देश संकटमा थियो, तब को सडकमा थियो ? राजतन्त्रदेखि बन्दुक बोकेकासँग कसले लड्यो ? कांग्रेसले लडेर शान्ति ल्यायो,” उनले भने, “आज फेरि कांग्रेसलाई कमजोर पार्ने षड्यन्त्र भइरहेको छ।”
उनले चेतावनी दिँदै भने, “यो पटक कांग्रेसले बहुमत नल्याए बाहिरी शक्तिहरूले देशलाई प्रयोगशाला बनाउने खतरा छ। देशलाई रणभूमि बन्नबाट जोगाउने शक्ति कांग्रेस मात्रै हो।”
विकासका सवालमा पनि चौरसिया स्पष्ट देखिए। आफूले पर्सा–२ लाई सधैं विकासको केन्द्रमा राखेको दाबी गर्दै उनले भने,
“मैले यो क्षेत्रलाई राजनीतिक प्रयोगशाला बन्न दिएको छैन। जितेपछि वृद्धाआश्रम, पुल, विश्वविद्यालय, सडक र आवश्यक भौतिक संरचना निर्माण गर्छु। काम नगरे अर्को चुनावमा उम्मेदवार नै बन्दिन।”
