वीरगंज । अशोक राई नेतृत्वको जनता समाजवादी पार्टी (जसपा) का वीरगन्ज महानगर अध्यक्ष इश्वरचन्द्र यादव नेकपा एमालेमा प्रवेश गरेका छन्। वीरगन्ज महानगरपालिका वडा नम्बर १५ मा शुक्रबार आयोजित नेकपा एमालेको पार्टी प्रवेश कार्यक्रममा यादवसहित वडा नम्बर १५ का १२० जना नेता तथा कार्यकर्ता एमालेमा प्रवेश गरेका हुन्।
नवप्रवेशीहरूलाई नेकपा एमालेका केन्द्रीय सदस्य तथा पर्सा जिल्ला इन्चार्ज प्रभु हजरा, केन्द्रीय सदस्य तथा वीरगन्जका पूर्वमेयर विजयकुमार सरावगी, पर्सा जिल्ला अध्यक्ष डा. विश्वम्भर शर्मालगायतले पार्टीमा स्वागत गरेका थिए।
पार्टी प्रवेशपछि बोल्दै इश्वरचन्द्र यादवले मधेशका बाँकी मुद्दाको सम्बोधन अब नेकपा एमालेले नै गर्ने विश्वास व्यक्त गर्दै त्यसै कारण आफूहरू जसपा त्यागेर एमालेमा प्रवेश गरेको बताए। उनले केही शक्ति विदेशीको इशारामा नेपालको राष्ट्रियता र लोकतन्त्र समाप्त गर्ने षडयन्त्रमा लागेको आरोप लगाउँदै त्यसको प्रतिवाद गर्ने राजनीतिक शक्ति अहिले एमाले मात्रै भएको दाबी गरे।
कार्यक्रमका प्रमुख अतिथि तथा एमालेका केन्द्रीय सदस्य प्रभु हजराले जसपाका महानगर अध्यक्ष यादवसहितको एमाले प्रवेशले पर्सा निर्वाचन क्षेत्र नम्बर १ मा पार्टी थप मजबुत बनेको बताए। यसले पर्सा–१ मा एमाले उम्मेदवार प्रदीप यादवको जित थप सुनिश्चित हुने दाबीसमेत उनले गरे।
कार्यक्रममा एमाले पर्सा जिल्ला सचिव महेश दास, नेता पुरुषोत्तम लाल झा, गगनदेव पटेल, उमेशलाल सहनीलगायतको सहभागिता रहेको थियो।
