वीरगंज । आगामी फागुन २१ गते हुने प्रतिनिधिसभा सदस्य निर्वाचनलाई मध्यनजर गर्दै नेपाल मुस्लिम संघ पर्साले पर्सा क्षेत्र नम्बर १ मा नेपाली कांग्रेसका उम्मेदवार अनिल कुमार रुंगटालाई विजयी गराउने उद्देश्यसहित चुनावी भेला सम्पन्न गरेको छ।
नेपाल मुस्लिम संघ पर्साको आयोजनामा सम्पन्न उक्त भेलामा अगामी निर्वाचनमा पर्सा क्षेत्र नं. १ बाट कांग्रेसका उम्मेदवार रुंगटालाई अत्यधिक मतले विजयी गराउन मुस्लिम समुदाय एकजुट भएर अघि बढ्ने प्रतिबद्धता व्यक्त गरिएको थियो।
कार्यक्रममा मन्तव्य राख्दै नेपाली कांग्रेस पर्साका जिल्ला सचिव इम्तियाज आलमले पर्सा क्षेत्र नं. १ बाट कांग्रेस उम्मेदवार अनिल कुमार रुंगटालाई जिताउनु सम्पूर्ण क्षेत्रवासीको हितमा हुने बताउनुभयो। “अनिल रुंगटा विकास पुरुषका रूपमा परिचित नेता हुनुहुन्छ। उहाँको जित पर्सा–१ का जनताको जित हो,” उहाँले भन्नुभयो। क्षेत्रको विकासका लागि आवश्यक सबै काम उहाँले गर्नेमा आफू विश्वस्त रहेको पनि आलमले उल्लेख गर्नुभयो।
त्यसैगरी नेपाली कांग्रेस पर्साका उपसभापति रामनारायण कुर्मीले हुन लागेको निर्वाचनमा मुस्लिम समुदायको भूमिका निर्णायक रहने बताउनुभयो। “अनिल रुंगटाको जीतले पर्सा क्षेत्र नं. १ का सम्पूर्ण बासिन्दाहरू लाभान्वित हुनेछन्,” उहाँले भन्नुभयो।
भेलालाई सम्बोधन गर्दै नेपाली कांग्रेस पर्सा क्षेत्र नं. १ का उम्मेदवार रुंगटाले आफू निर्वाचित भएमा क्षेत्रको विकासका लागि कुनै कसर बाँकी नराख्ने प्रतिबद्धता व्यक्त गर्नुभयो। “यस क्षेत्रका समस्या मेरा आफ्नै समस्या हुन्। ती समस्याहरू समाधान गर्न म सम्बन्धित निकायसम्म आवाज बुलन्द गरेर बोल्नेछु,” उहाँले भन्नुभयो। विगतमा देखिएका कठिनाइहरू समयमै समाधान गर्ने, जनताको अधिकारका लागि संसद्मा आवाज उठाउने र आवश्यक परे जनतासँग काँधमा काँध मिलाएर अघि बढ्ने उहाँको प्रतिबद्धता थियो।
कार्यक्रममा उपस्थित जनसमुदायले एक स्वरमा अनिल कुमार रुंगटालाई विजयी बनाउने नारा लगाएका थिए। स्थानीय मुस्लिम समुदायले आफ्नो मत नेपाली कांग्रेसलाई दिने जनाएका थिए।
