वीरगंज । राष्ट्रिय वाणिज्य बैंकको ६१औँ वार्षिकोत्सवको अवसरमा मंगलबार वीरगंजमा रक्तदान कार्यक्रम सम्पन्न भएको छ। बैंकको प्रादेशिक कार्यालय परिसर, वीरगंजमा आयोजित कार्यक्रममा ७ जना महिला सहित कुल ४३ जनाले रक्तदान गरेका छन्।
कार्यक्रम संयोजक आलोक रञ्जन कर्णका अनुसार रक्तदान कार्यक्रमको शुभारम्भ राष्ट्रिय वाणिज्य बैंक कर्मचारी संघका प्रादेशिक अध्यक्ष राहुल कुमार ओझाले रक्तदान गरेर गर्नुभएको थियो । कार्यक्रममा रबि प्रसाद कानु, आयुष कोइराला, अशोक यादव, दिपा दास, मिना श्रेष्ठ लगायतले रक्तदान गरेका थिए।
बैंकका प्रादेशिक प्रबन्धक कमलेश ठाकुरको प्रमुख आतिथ्यतामा सम्पन्न कार्यक्रममा राष्ट्रिय वाणिज्य बैंक कर्मचारी संघका अध्यक्ष राहुल कुमार ओझा, नेपाल वित्तीय संस्था कर्मचारी संघका मोद नारायण चौधरी, नेपाल राष्ट्रिय कर्मचारी संगठनका आलोक रञ्जन कर्ण लगायतको उपस्थिति रहेको थियो।
रक्तदान कार्यक्रम नेपाल रेडक्रस सोसाइटीको रक्त सञ्चार केन्द्र, वीरगंजको प्राविधिक सहयोगमा सम्पन्न भएको हो।
