वीरगंज । पर्सा निर्वाचन क्षेत्र नम्बर १ मा आगामी फागुन २१ गते हुने प्रतिनिधि सभा निर्वाचनका लागि नेपाली कांग्रेसबाट चुनाव लड्ने इच्छा राखेका अजय द्विवेदीलाई पार्टीले टिकट नदिएपछि उनी अचम्मित भएका छन् । क्षेत्रवासीले टिकट नपाएपछि उनी स्वतन्त्र उम्मेदवारका रूपमा मैदानमा उत्रने आँकलन गरे पनि यसपटक उनले उम्मेदवारी दर्ता गरेनन् ।
उम्मेदवारी दर्ताको समय सकिएपछि सामाजिक सञ्जाल फेसबुकमा प्रतिक्रिया दिँदै द्विवेदीले लेखेका छन्, “जिल्लामा साख, पार्टीमा संगठन अनि क्षेत्रमा सहयोग हुँदाहुँदै नेपाली काङ्ग्रेस पार्टीले मलाई उम्मेदवार नबनाएकोमा अलि अचम्मित त पक्कै पनि छु।”
उनले देश र पार्टीमा पुस्तान्तरण र परिवर्तनका आवाज उठिरहेको सन्दर्भ उल्लेख गर्दै “यो पालि नउठ्ने निर्णय समयसापेक्ष नै ठहरिन्छ” भन्ने धारणा राखेका छन् ।
पार्टीका आधिकारिक उम्मेदवारप्रति समर्थन जनाउँदै उनले लेखेका छन्, “अनिलजी र म पुराना मित्र हौँ। उहाँ पार्टीको आधिकारिक उम्मेदवार हुनासाथ मद्वारा हुन सक्ने जति सहयोग म गर्नेछु।” पर्सा–१ मा नेपाली कांग्रेसका उम्मेदवार अनिल कुमार रुंगटा रहेका छन् ।
आफूलाई लिएर उठेका विभिन्न टिप्पणीप्रति प्रतिक्रिया जनाउँदै द्विवेदीले थप लेखेका छन्, “कसैले सेटिङको कुरा गर्नुभएको छ, कसैले राजनीति सकिने कुरा गर्नुभएको छ। ११ वर्षको उमेरमा ने.वि. संघ हुँदै नेपाली काङ्ग्रेसको राजनीतिमा आएको थिएँ। प्रशासनबाट कहिले ठूलोबुबालाई थुन्ने, कहिले मार्ने धम्की सुन्दै आएको त्यो ठिटोलाई एउटा संसद् भवनले लोभ्याउने कुरा हास्यास्पद लाग्छ।”
उनले राजनीति स्वार्थ र पदका लागि गर्नेको राजनीति सकिने भन्दै “हामी सधैँ सिद्धान्तका लागि लडेका मान्छे हौँ, अन्तिम श्वाससम्म यो लडाइँ जारी रहनेछ” भन्ने स्पष्ट सन्देश दिएका छन् ।
यसअघि पनि कांग्रेसले अन्य दलसंग गठबन्धन गरेका कारण टिकट नपाएपछि द्विवेदी स्वतन्त्र उम्मेदवारका रूपमा निर्वाचनमा होमिएका थिए । त्यस निर्वाचनमा उनी जनता समाजवादी पार्टीका उम्मेदवार प्रदीप यादवसँग केही मतको अन्तरले पराजित भएका थिए ।
यसपालिकाकाे निर्वाचनमा पनि उनलाई राष्ट्रिय स्वतन्त्र पार्टीले टिक दिन तयार रहेपनि उनले कांग्रेसबाट टिकट पाउने आशमा रास्वपामा गएनन् ।
