वीरगंज । नेपाली कांग्रेसले आगामी फागुन २१ गते हुने प्रतिनिधिसभा सदस्य निर्वाचनका लागि पर्सा जिल्लाका चारवटै निर्वाचन क्षेत्रका उम्मेदवार टुङ्गो लगाएको छ । सोमबार राति बसेको कांग्रेस उम्मेदवार छनौट समितिको बैठकले जिल्लाका सबै क्षेत्रमा उम्मेदवारको नाम टुंगो लगाएको हो ।
कांग्रेसले पर्सा निर्वाचन क्षेत्र नम्बर १ बाट पार्टीका पूर्व केन्द्रीय सदस्य तथा संविधानसभा सदस्य अनिल रुंग्टालाई उम्मेदवार बनाएको छ । त्यस्तै, क्षेत्र नम्बर २ बाट पूर्व मन्त्री एवं निवर्तमान प्रतिनिधिसभा सदस्य अजयकुमार चौरसिया, क्षेत्र नम्बर ३ बाट पूर्व मन्त्री सुरेन्द्र चौधरी र क्षेत्र नम्बर ४ बाट पूर्व मन्त्री तथा निवर्तमान प्रतिनिधिसभा सदस्य रमेश रिजालले टिकट पाएका छन् ।
यसपटक कांग्रेसले पर्सामा नयाँ अनुहारभन्दा पुराना र अनुभवी नेताहरूलाई नै प्राथमिकता दिएको देखिन्छ । टिकट पाउने उम्मेदवारहरूमध्ये अनिल रुंग्टाबाहेक अन्य सबैले अघिल्ला निर्वाचनहरूमा पनि सोही क्षेत्रबाट प्रतिस्पर्धा गरिसकेका छन् । गत निर्वाचनमा पनि क्षेत्र नम्बर २ बाट चौरसिया, क्षेत्र नम्बर ३ बाट चौधरी र क्षेत्र नम्बर ४ बाट रिजाल चुनाव लडेका थिए ।
पार्टी सभापतिमा गगन थापा आएपछि यसपटक टिकटमा केही फेरबदल हुन सक्ने अड्कलबाजी गरिए पनि अन्ततः कांग्रेसले निरन्तरताकै बाटो रोजेको छ । पार्टीभित्र लामो समयसम्म चलेको रस्साकस्सीपछि पुरानै अनुहारलाई दोहोर्याउने निर्णयले पर्साको चुनावी समीकरणमा कस्तो प्रभाव पार्छ भन्ने विषयलाई लिएर राजनीतिक वृत्तमा चासो बढेको छ ।
