वीरगंज । अगामी फागुन २१ गते हुने प्रतिनिधि सभा सदस्य निर्वाचनका लागि उम्मेदवार मनोनयन दर्ता अघिल्लो दिन साँझसम्म पनि नेपाली कांग्रेसले पर्साका उम्मेदवारको अन्तिम टुंगो लगाउन सकेको छैन।
पार्टी स्रोतका अनुसार पर्सा क्षेत्र नम्बर ३ र ४ मा कांग्रेसबाट पुनः पुरानै अनुहार दोहोरिने करिब–करिब निश्चित जस्तै देखिएको छ। क्षेत्र नम्बर ३ बाट सुरेन्द्र प्रसाद चौधरी र क्षेत्र नम्बर ४ बाट रमेश रिजालको नाम लगभग टुंगो लागिसकेको भए पनि औपचारिक निर्णय भने अझै सार्वजनिक भएको छैन।
यसैबीच, पर्सा क्षेत्र ३ का उम्मेदवार सुरेन्द्र प्रसाद चौधरी र क्षेत्र ४ का उम्मेदवार रमेश रिजालका समर्थकहरूले मंगलबार मनोनयन दर्ताका लागि स्थान नै तोकेर भेला हुन आह्वान गरिसकेका छन्। तर पर्साका चारवटै क्षेत्रमध्ये कुनैपनि क्षेत्रमा पार्टीको आधिकारिक निर्णय नभएको कांग्रेसका केन्द्रीय सदस्य रामरुप कुर्मीले जानकारी दिए।
उनका अनुसार गगन, देउवा र शेखर पक्षका शीर्ष नेताहरूबीच निरन्तर छलफल भइरहेको छ। “तीनै पक्षबीच छलफल चलिरहेकै छ, तर पर्साको हकमा साेमबार बेलुकीसम्म पनि कुनै क्षेत्रको उम्मेदवारबारे अन्तिम निर्णय भइसकेको छैन,” कुर्मीले बताए।
कांग्रेसभित्र पर्सा क्षेत्र नम्बर १ मा अनिल रुंगटा र अजय द्विवेदीमध्ये एक जनालाई उम्मेदवार बनाउने सम्भावना रहेको छ भने क्षेत्र नम्बर २ मा अजय चौरसिया र राजेन्द्र बहादुर अमात्यमध्ये एक जनाले टिकट पाउने प्रबल सम्भावना रहेको स्रोतको दाबी छ।
