सेढवा । पर्सा जिल्लाको ग्रामीण भेगमा माघे संक्रान्ति, खिचडी अर्थात् माघ १ गते मनाइने माघी पर्वको चहलपहल बढेको छ। आदिवासी जनजाति थारु समुदायको नयाँ वर्ष २६५० सुरु हुने भएकाले यो समुदायले माघी पर्वलाई विशेष उत्साहका साथ मनाउँदै आएको छ।
थारु समुदायको प्राचीन परम्पराअनुसार माघ १ गते नयाँ वर्षको दिन किसानहरूले वार्षिक आय–व्ययको हिसाबकिताब नयाँ–पुरानो गर्ने चलन रहिआएको छ। ग्रामीण भेगमा बसोबास गर्ने थारु समुदायसँगै अन्य समुदायका मानिसहरू पनि पर्वको तयारीमा जुटेका छन्।
मंगलबारदेखि यस क्षेत्रका गृहिणीहरू घर–आँगनको सरसफाइ, लत्ताकपडा धुनेलगायत काममा व्यस्त देखिएका छन्। साथै पर्वका लागि भुजाको लड्डु, चिउराको लड्डु, तिलको लड्डु, कसारलगायत परिकारको तयारी तथा किनमेल तीव्र बनेको छ।
माघ १ गते माघीको दिन बिहान स्थानीय खोला, नदी तथा जलाशयमा स्नान गरी किसानहरूले उत्पादन गरेका चामल, भुजा, तिल, रामदाना लड्डु तथा नयाँ बाली आलु, तोरी, नुनलगायत सामग्री स्पर्श गरी पुरोहितलाई दान दिने परम्परा छ। माघीको अवसरमा छोरी–बहिनीका ससुराली तथा आफन्तको घरमा माछा, मासु, मिठाई र विभिन्न परिकार पुर्याउने चलनसमेत रहेको छ।
यस वर्ष पर्साका पाँच स्थानमा माघी खिचडी विशेष कार्यक्रम आयोजना हुने जनाइएको छ। वीरगञ्जको आदर्शनगरस्थित स्विमिङ पुलमा माघी खिचडी मूल समारोह समिति पर्साको आयोजनामा हुने कार्यक्रममा सम्पूर्ण तयारी पूरा भएको कार्यक्रम संयोजक जङ्गबहादुर चौधरीले जानकारी दिनुभयो। उहाँका अनुसार कार्यक्रममा थारु परम्परा झल्काउने पहिरन, गीत तथा नृत्य प्रस्तुत गरिनेछ भने थारु सम्बतको नयाँ वर्षको अवसरमा खुला रक्तदान कार्यक्रमसमेत आयोजना गरिनेछ।
त्यसैगरी जिराभवानी गाउँपालिका वडा नं. ३ को नौकाटोला चोकमा पनि माघी खिचडी विशेष कार्यक्रम आयोजना हुने भएको छ। गाउँपालिकाको आयोजनामा तथा वडा नं. ३ युवा समाजको व्यवस्थापनमा सञ्चालन हुने कार्यक्रममा थारु समुदायका परम्परागत खानाका परिकार—माछा, घोंगी, गंगटो, हाँस, परेवा र कुखुराको मासुका स्टलहरू राखिने स्थानीय युवा हरिशंकर रायले जानकारी दिनुभयो।
त्यस्तै पटेर्वासुगौली गाउँपालिकाको आयोजनामा वडा नं. ४ को खेल मैदानमा तथा सखुवाप्रसौनी गाउँपालिकाको आयोजनामा पञ्चगावाको खुला मैदानमा माघी विशेष कार्यक्रम आयोजना गरिनेछ। उता थारु कल्याणकारी समिति पर्सागढी नगरपालिकाको आयोजनामा बागवानामा पनि माघी खिचडी कार्यक्रम मनाइने तयारी भइरहेको छ।
