पोखरिया । पर्साको पोखरिया नगरपालिका वडा नं. ४ मा अवस्थित प्रादेशिक अस्पताल पोखरियाको मधेश प्रदेश सरकारका मुख्यमन्त्री कृष्णा प्रसाद यादव तथा स्वास्थ्य तथा जनसंख्या मन्त्री जंगी लाल रायले एक कार्यक्रमबीच संयुक्त रूपमा समुद्घाटन गर्नुभएको छ।
कार्यक्रमलाई सम्बोधन गर्दै मुख्यमन्त्री कृष्णा प्रसाद यादवले प्रादेशिक अस्पताल पोखरियाको छिट्टै उन्नति तथा प्रगति हुने विश्वास व्यक्त गर्नुभयो। मधेश प्रदेशमा कार्यरत चिकित्सकहरूलाई दरबन्दी भएको स्थानमै पठाउन मन्त्रालयका सचिवलाई निर्देशन दिइसकेको उल्लेख गर्दै अटेरी गरेमा कारबाही गरिने चेतावनी दिनुभयो। साथै अस्पतालका लागि भौतिक संरचना, उपचार उपकरण, ल्याब केमिकल तथा आवश्यक जनशक्ति यथाशीघ्र व्यवस्थापन गरिने आश्वासन दिनुभयो।
पोखरिया नगरपालिकाका नगरप्रमुख प्रद्युमन प्रसाद चौहानले अस्पतालको उन्नति तथा विकासका लागि प्रदेश सरकारको ध्यानाकर्षण गराउँदै स्थानीय सरकारले सक्दो सहयोग गरिरहेको र आगामी दिनमा पनि निरन्तर सहयोग गर्ने प्रतिबद्धता जनाउनुभयो। पोखरिया अस्पतालको समग्र विकासका लागि सर्वपक्षीय सहयोग आवश्यक रहेको उहाँको भनाइ थियो।
समुद्घाटन समारोहमा अस्पतालका मेडिकल सुपरिटेन्डेन्ट डा. आनन्द रौनियारले अस्पतालबाट उपलब्ध भइरहेका सेवा–सुविधा, वर्तमान अवस्था तथा बिरामी उपचारका लागि आवश्यक उपकरण, जनशक्ति र पूर्वाधारबारे प्रमुख अतिथि तथा उपस्थित जनसमुदायलाई जानकारी गराउनुभयो। साथै उहाँले अस्पताललाई थप प्रभावकारी बनाउन आवश्यक उपकरण तथा सेवा सुविधाको मागसहितको प्रतिवेदन मुख्यमन्त्री यादवलाई हस्तान्तरण गर्नुभयो।
कार्यक्रममा पोखरिया क्षेत्रमा रहेको १२ बिघा ऐलानी जग्गामा रंगशाला निर्माण तथा वडा नं. ४ स्थित विशाल हनुमान मन्दिरलाई पर्यटकीय स्थलका रूपमा विकास गर्न बजेट विनियोजनको मागसमेत उठाइएको थियो।
पूर्व मेयर दिपनारायण प्रसाद रौनियार लगायत अन्य वक्ताहरूले विनियोजित बजेट कम भएको भन्दै पत्रमार्फत प्रदेश सरकारको ध्यानाकर्षण गराएका थिए।
प्रादेशिक अस्पताल पोखरिया विकास समिति अध्यक्ष उमेश प्रसाद चौहानको अध्यक्षतामा सम्पन्न उक्त कार्यक्रममा स्वास्थ्य तथा जनसंख्या मन्त्री जंगी लाल राय, भूमि व्यवस्था तथा कृषि मन्त्री श्याम पटेल, वन तथा वातावरण मन्त्री शंकर प्रसाद चौधरी, पुर्व मन्त्री जनार्दन सिंह क्षेत्री लगायत प्रदेश सरकारका वर्तमान तथा पूर्व मन्त्री, सांसद, नगर जनप्रतिनिधि, राजनीतिक दलका प्रतिनिधि, सुरक्षा निकाय, बुद्धिजीवी, सञ्चारकर्मी, अस्पताल कर्मचारी तथा स्थानीय नागरिकहरूको उल्लेखनीय सहभागिता रहेको थियो।कार्यक्रमको सहजीकरण शिव पटेलले गर्नुभएको थियो।
समापन मन्तव्यमा अध्यक्ष उमेश प्रसाद चौहानले प्रदेश सरकारले दिएको जिम्मेवारी इमानदारीपूर्वक वहन गर्दै पोखरिया अस्पतालको प्रगतिको लागि हक अधिकारका निम्ति संघर्ष गर्ने प्रतिबद्धता व्यक्त गर्नुभयो ।
