वीरगंज । जेन-जी पर्साको समन्वय र अग्रसरतामा वीरगंजस्थित हरिखेतान बहुमुखी क्याम्पसमा देखिएको विवादका विषयमा पहिलो चरणको बैठक सम्पन्न भएको छ।
क्याम्पसलाई निजीकरणतर्फ लैजाने गतिविधि, सञ्चालक समितिद्वारा गरिएको मनपरी नियुक्ति तथा अन्य संरचनागत समस्याका कारण शिक्षक, विद्यार्थी र समग्र शैक्षिक वातावरणमा नकारात्मक असर परिरहेको विषयमा बैठकमा गम्भीर छलफल भएको जेन जी पर्साका संयोजक विशेष साहले जानकारी दिए।
बैठकमा सहभागीहरूले क्याम्पसको शैक्षिक मर्यादा, संस्थागत स्वायत्तता र सार्वजनिक हितलाई जोगाउन तत्काल पहल आवश्यक रहेकोमा जोड दिएका थिए। समस्याको दीर्घकालीन र संस्थागत समाधानका लागि शिक्षक, विद्यार्थी, सञ्चालक समिति, अभिभावक तथा सरोकारवाला सबै पक्षसँग चरणबद्ध रूपमा संवाद अगाडि बढाइने जेन जी पर्साले जनाएको छ।
सार्वजनिक शैक्षिक संस्थाको संरक्षण र सुधारका लागि युवाहरूले देखाएको सक्रियता सराहनीय रहेको सहभागीहरूको भनाइ थियो। बैठकले हरिखेतान बहुमुखी क्याम्पसको शैक्षिक गुणस्तर र विश्वास पुनःस्थापना गर्न सकारात्मक वातावरण सिर्जना गर्ने अपेक्षा गरिएको छ।
