मुम्बई । बलिउड अभिनेता रणवीर सिंह अभिनीत एक्सन फिल्म ‘धुरन्धर’ ले नेपाली बक्स अफिसमा उत्कृष्ट व्यापार गर्न सफल भएको छ। चलचित्र विकास बोर्डले सोमबार सार्वजनिक गरेको सिनेमा : बक्स अफिस रिपोर्टअनुसार फिल्मले नेपालमा ८ करोड ९९ लाख ९३ हजार २८८ रुपैयाँ (नेरु) ग्रस आम्दानी गरेको छ।
रिपोर्टअनुसार नेपालभर फिल्मका २ लाख ७४ हजार ७२३ टिकट बिक्री भएका छन्, जसले दर्शकहरूको उल्लेखनीय आकर्षण पुष्टि गरेको छ।
डिसेम्बर ५ मा रिलिज भएको ‘धुरन्धर’ ले बलिउड बक्स अफिसमा पनि कमाइको सुनामी ल्याउँदै एकपछि अर्को ठूला रेकर्ड तोडिरहेको छ। आदित्य धरको निर्देशनमा बनेको यो फिल्म एक स्पाई–थ्रिलर जनरामा आधारित छ, जसलाई सत्य घटनाबाट प्रेरित भनिएको छ।
फिल्ममा रणवीर सिंहसँगै सञ्जय दत्त, अक्षय खन्ना, अर्जुन रामपाल, आर. माधवन र सारा अर्जुनले मुख्य भूमिका निर्वाह गरेका छन्। सशक्त कलाकार समूह, दमदार कथा र उच्चस्तरीय एक्सनका कारण ‘धुरन्धर’ ले नेपाल र भारत दुवै बजारमा दर्शकको राम्रो प्रतिक्रिया पाइरहेको छ।
