वीरगंज । अशोक राई नेतृत्वको जनता समाजवादी पार्टी (जसपा) फेरि विभाजित भएको छ। यसअघि राजेन्द्र श्रेष्ठको नेतृत्वमा विभाजन भइसकेको जसपा यसपटक उपाध्यक्ष रेणु यादवको नेतृत्वमा फुटेको हो।
उपेन्द्र यादव नेतृत्वको जनता समाजवादी पार्टी (जसपा) नेपाल र महन्त ठाकुर नेतृत्वको लोकतान्त्रिक समाजवादी पार्टी (लोसपा) नेपालबीच आइतबार पार्टी एकीकरणका लागि सैद्धान्तिक सहमति भएको भोलिपल्टै अशोक राई नेतृत्वको जसपामा ठूलो विभाजन आएको हो।
जसपाकी उपाध्यक्ष रेणु यादवको नेतृत्वमा केही नेताहरु उपेन्द्र यादव नेतृत्वको जसपा नेपालमा फर्किएका छन्। उपेन्द्र यादव र रेणु यादवले सोमबार संयुक्त विज्ञप्ति जारी गर्दै एकताको औपचारिक जानकारी दिएका छन्।
रेणु यादवसँगै पूर्व मन्त्री प्रदीप यादवलगायतका प्रभावशाली नेताहरूले अशोक राईसँगको सहकार्य अन्त्य गर्दै जसपा नेपालमा पुनः आबद्ध भएको घोषणा गरेका छन्। पूर्व मन्त्री प्रदीप यादवले पार्टीका बहुमत सदस्यहरूसहित मधेस केन्द्रित शक्तिको ध्रुवीकरणमा आफूहरू लागेको बताएका छन्।
यता, जसपाका अध्यक्ष अशोक राईले केही नेताहरू जसपा नेपालमा गएको स्वीकार गरे पनि आफू भने नजाने स्पष्ट पारेका छन्। “म जाने होइन, केही नेताहरू जान लागेका छन्,” राईले प्रतिक्रिया दिएका छन्।
यसअघि २०८१ वैशाखमा उपेन्द्र यादव अमेरिका भ्रमणमा रहेका बेला अशोक राईले जसपा नेपालबाट अलग हुँदै नयाँ जसपा गठन गरेका थिए। आइतबार जसपा नेपाल र लोसपाबीच एकीकरणको सहमति भएपछि राई पक्षका मधेसी नेताहरूमाथि पनि एकताका लागि दबाब बढेको थियो।
स्रोतका अनुसार अध्यक्ष राई एकीकरणका लागि तयार नभएपछि रेणु यादवको नेतृत्वमा केही नेताहरूले उपेन्द्र यादवसँग एकता गर्ने निर्णय गरेका हुन्। यस एकताले मधेस केन्द्रित राजनीतिमा नयाँ शक्ति सन्तुलन कायम गर्ने अपेक्षा गरिएको छ।
यसैबीच, हृदयेश त्रिपाठी नेतृत्वको जनता प्रगतिशील पार्टी पनि एकीकरण प्रक्रियामा सामेल हुने चर्चा चलेको छ। मधेस केन्द्रित दलहरूको बढ्दो ध्रुवीकरणले आगामी निर्वाचनमा ठूला दलहरूलाई कडा चुनौती दिने राजनीतिक विश्लेषकहरूको अनुमान छ।
