वीरगंज । नवरात्रको पहिलो दिन आज नेपालीले घरघरमा घटस्थापना गरी जमरा राखेका छन् । यस अवसरमा नवदुर्गाको पहिलो स्वरूप माता शैलपुत्रीको आह्वान गर्दै विधिपूर्वक पूजाआराधना गरिँदैछ ।
नवरात्रका अवसरमा घरको पूजाकोठा वा दसैँघरमा विधिपूर्वक घटस्थापना गरी जमरा राख्ने परम्परा छ । घटस्थापनापछि माता शैलपुत्रीको आह्वान गरेर पूजा गरिन्छ ।
शैलपुत्री नवदुर्गाका नौ स्वरूपमध्ये पहिलो स्वरूप हुन् । देवीकवच र मार्कण्डेय पुराणलगायत धार्मिक ग्रन्थमा गिरिराज हिमालयकी पुत्री पार्वतीलाई शैलपुत्रीका रूपमा उल्लेख गरिएको छ । हिन्दू धार्मिक मान्यताअनुसार नवरात्रको पहिलो दिन माता शैलपुत्रीको पूजाआराधना गरी भक्तजनले सुख, शान्ति र समृद्धिको कामना गर्ने गर्छन् ।
