वीरगंज । वीरगंजको मुख्य चोक घण्टाघरबाट शनिबार साँझ एक मोटरसाइकल चोरी भएको छ । नेपाल प्रहरी र सशस्त्र प्रहरीको ड्युटी रहने चोकबाटै मोटरसाइकल चोरी भएपछि सुरक्षा व्यवस्थामाथि प्रश्न उठेको छ ।
पर्साको छिपहरमाई गाउँपालिका–१, मिर्जापुर निवासी अनरजित साह तेलीको नाममा दर्ता रहेको बा १८ प २५११ नम्बरको हिरो होन्डा स्प्लेन्डर मोटरसाइकल चोरी भएको हो ।
सवारीधनीका अनुसार घण्टाघरस्थित एक पसलअगाडि पार्किङ गरेर राखिएको मोटरसाइकल अज्ञात व्यक्तिले चोरेर लगेका हुन् । घटनासम्बन्धी सीसीटीभी फुटेजमा दुई जना अज्ञात व्यक्ति मोटरसाइकल लिएर गएको देखिए पनि उनीहरूको पहिचान हुन नसकेको उनले बताए ।
दसैँ सुरु हुनै लाग्दा वीरगंजको मुख्य व्यस्त चोकबाटै मोटरसाइकल चोरी भएपछि सवारीसाधनको सुरक्षा र चोरी नियन्त्रणमा प्रहरीको सक्रियतामाथि प्रश्न उठेको छ । प्रहरीको नियमित ड्युटी रहने स्थानबाटै चोरी हुनु सुरक्षा चुनौतीका रूपमा देखिएको छ ।
