वीरगंज । अन्तर्राष्ट्रिय श्रम संगठन (आईएलओ) र राष्ट्रिय सहकारी महासंघको सहयोग तथा जिल्ला सहकारी संघ, पर्साको आयोजनामा सहकारी सदस्यहरूका लागि पाँचदिने ‘Start.CareCOOP’ स्याहार अर्थतन्त्रमा सहकारी व्यवसाय मोडेलसम्बन्धी तालिम सुरु भएको छ ।
शनिबारदेखि सुरु भएको तालिममा जिल्ला सहकारी संघ, पर्साका कार्यसमिति सदस्य तथा कर्मचारीसहित १२ वटा सहकारी संस्थाका २८ जनाको सहभागिता रहेको छ ।
तालिमको उद्घाटन जिल्ला सहकारी संघ, पर्साका अध्यक्ष हरिन्द्र सिंहले गर्नुभएको हो । उद्घाटनका क्रममा अध्यक्ष सिंहले पर्सामा स्याहारसम्बन्धी व्यावसायिक योजना तयार गरी सहकारीमार्फत विभिन्न प्रकारका स्याहार सेवा सञ्चालन गर्न सकिने बताउनुभयो । उहाँले एकीकृत रूपमा स्याहार सेवा प्रदान गर्दा सहकारीका सदस्य तथा स्याहारकर्ताको आर्थिक सशक्तीकरण हुनुका साथै सेवाग्राहीसमेत लाभान्वित हुने विश्वास व्यक्त गर्नुभयो ।
तालिमको मुख्य उद्देश्य स्याहार सेवा प्रदान गर्न नयाँ सहकारी स्थापना गर्न चाहने तथा विद्यमान सहकारीलाई स्याहारमुखी सेवामा रूपान्तरण गर्न चाहनेहरूलाई चरणबद्ध मार्गदर्शन प्रदान गर्नु रहेको छ । साथै, सहकारी स्थापना वा स्तरोन्नतिका क्रममा उचित निर्णय लिन सहजीकरण गर्ने तथा बाल स्याहार सहकारी सञ्चालनका लागि व्यावसायिक योजना तयार गर्न सहयोग पुर्याउने लक्ष्य राखिएको छ ।
कार्यक्रममा जिल्ला सहकारी संघका सदस्य राजेश पण्डितले स्वागत मन्तव्य व्यक्त गर्नुभएको थियो । तालिममा मुख्य सहजकर्ता सुरज पण्डित र सहयोगी सहजकर्ता रामाकान्त चौधरीले सहजीकरण गरिरहनुभएको छ ।
