वीरगंज । अखिल क्रान्तिकारीका केन्द्रीय सचिव मिरोज अहमद पर्सा निर्वाचन क्षेत्र नम्बर ३ बाट प्रतिनिधि सभा सदस्यका लागि समानुपातिक सांसदमा सिफारिस भएका छन् । नेपाली कम्युनिस्ट पार्टी (नेकपा) पर्साले उनलाई जनवर्गीय समूहअन्तर्गत मुस्लिम क्लस्टरबाट सिफारिस गरेको हो ।
मिरोज अहमद वि.सं. २०७३ सालमा अखिल क्रान्तिकारीको सदस्यका रूपमा विद्यार्थी राजनीतिमा प्रवेश गरेका हुन् । एक दशकभन्दा लामो समयदेखि विद्यार्थी राजनीतिमा सक्रिय रहेका उनी एमाले र माओवादी केन्द्रबीच एकता भई नेकपा गठन भएपछि जिल्ला कमिटी सदस्य बनेका थिए । त्यसपछि उनले वीरगंज महानगर कमिटी सह–संयोजक, महानगर कमिटी सचिव हुँदै पर्सा जिल्ला अध्यक्षको जिम्मेवारी सम्हाल्दै संगठन विस्तार र सुदृढीकरणमा सक्रिय भूमिका निर्वाह गरेका छन् ।
अखिल क्रान्तिकारीको २३औँ राष्ट्रिय सम्मेलनबाट मिरोज केन्द्रीय सचिव पदमा निर्विरोध निर्वाचित भएका हुन् । लामो समयदेखि निरन्तर संगठन र विद्यार्थी आन्दोलनमा सक्रिय रहँदै आएको पृष्ठभूमिका कारण उनको निर्विरोध चयनले नेतृत्व क्षमता, संगठनप्रतिको प्रतिबद्धता र लोकप्रियतालाई प्रमाणित गरेको पार्टी नेताहरूको भनाइ छ ।
युवा पुस्ताको प्रतिनिधित्व गर्ने नेताका रूपमा परिचित मिरोज विद्यार्थीका मुद्दासँगै शिक्षा, रोजगारी, समान सहभागिता र सामाजिक न्यायजस्ता समसामयिक सामाजिक तथा राजनीतिक सवालमा पनि निरन्तर सक्रिय रहँदै आएका छन् । उनले सरोकारवाला निकायको ध्यानाकर्षण गराउँदै दबाबमूलक भूमिका निर्वाह गर्नुका साथै विभिन्न सामाजिक अभियानमार्फत सामाजिक उत्तरदायित्वको अभ्यासलाई पनि प्राथमिकता दिँदै आएका छन् ।
वीरगंजमा सञ्चालन भएको जेन–जी आन्दोलनमा समेत मिरोजले नेतृत्वदायी भूमिका निर्वाह गरेका थिए । यही पृष्ठभूमिका आधारमा पार्टीले उनलाई जेन–जी पुस्ताको प्रतिनिधित्व गर्ने युवा नेताका रूपमा पर्सा क्षेत्र नम्बर ३ बाट समानुपातिक सांसदका लागि सिफारिस गरेको नेकपा पर्साले जनाएकाे छ ।
