वीरगंज । वीरगंजस्थित सिद्धार्थ बैंकले आफ्नो २३औँ वार्षिकोत्सवको अवसरमा आयोजना गरेको रक्तदान कार्यक्रममा ५३ जनाले रक्तदान गरेका छन्।
वीरगन्जस्थित सिद्धार्थ बैंकको मुख्य शाखा र मुर्ली शाखाले संयुक्त रूपमा आयोजना गरेको रक्तदान कार्यक्रममा ३ जना महिलासहित ५३ जना रक्तदाताले उत्साहपूर्वक सहभागिता जनाएका हुन्।
कार्यक्रमबारे जानकारी दिँदै सिद्धार्थ बैंक वीरगन्ज शाखाकी श्वेता मानन्धरले सामाजिक सेवाको भावनालाई आत्मसात गर्दै वार्षिकोत्सवलाई मानवीय सेवामार्फत मनाइएको बताइन्। त्यसैगरी सिद्धार्थ बैंक मुर्ली शाखाका प्रमुख भरत पौडेलले वार्षिकोत्सवको अवसरमा सामाजिक उत्तरदायित्वअन्तर्गत रक्तदान कार्यक्रम आयोजना गरिएको जानकारी दिए।
पौडेलले बैंक केवल वित्तीय कारोबारमा मात्र सीमित नभई समाजका पीडामा साथ दिने जिम्मेवार संस्थाका रूपमा अघि बढिरहेको उल्लेख गर्दै रक्तदानजस्तो मानवीय कार्यले समाजमा सकारात्मक सन्देश प्रवाह गर्ने विश्वास व्यक्त गरे। भविष्यमा पनि यस्ता सामाजिक कार्यक्रमलाई निरन्तरता दिइने उनले बताए।
रक्तदान कार्यक्रममा सिद्धार्थ बैंकका मधेस प्रदेश प्रमुख ज्ञानेन्द्र कार्की, वीरगन्ज शाखा प्रमुख मात्रिका खनाल, पर्साका प्रमुख जिल्ला अधिकारी भोला दाहल, पर्साका प्रहरी उपरीक्षक सुदिपराज पाठक लगायतको समेत उपस्थिति रहेको थियो।
