कलैया । बाराको कलैयामा बुधबार ‘सञ्चारमाध्यमको अवस्था र चुनौती’ विषयक अन्तरक्रिया कार्यक्रम सम्पन्न भएको छ। मिडिया काउन्सिल मधेस प्रदेशको आयोजनामा सम्पन्न उक्त गोष्ठीको उद्घाटन पूर्व मुख्यमन्त्री एवं प्रदेश सांसद जितेन्द्र सोनलले गरेका थिए।
गोष्ठीको उद्घाटन सत्रलाई सम्बोधन गर्दै पूर्व मुख्यमन्त्री सोनलले देश विकासका लागि सकारात्मक सोच अपरिहार्य रहेको बताए । सञ्चार माध्यमको विकासका लागि पनि सकारात्मक सोचसँगै विषयगत विज्ञता आवश्यक रहेको उनको भनाइ थियो।
कार्यक्रमका प्रमुख अतिथि समेत रहेका सोनलले पत्रकारितामा समाचारको विश्वसनीयतामा विशेष ध्यान दिनुपर्ने आवश्यकता औंल्याए । उनले राज्यले सञ्चारमाध्यमको नियमन गर्दै संरक्षण र प्रवर्द्धनको सम्पूर्ण जिम्मेवारी लिनुपर्ने धारणा व्यक्त गरे ।
राजनीतिक सन्दर्भमा बोल्दै सोनलले तोकिएको मितिमै निर्वाचन हुनुपर्ने बताए । तोकिएको समयमा चुनाव नभए मुलुक थप द्वन्द्वमा फस्न सक्ने चेतावनी दिँदै उनले समयमै निर्वाचन गराउन सबै पक्षको प्रयास र पहल आवश्यक रहेकोमा जोड दिए ।
मिडिया काउन्सिल मधेस प्रदेशका कार्यवाहक अध्यक्ष सुरेश यादवको अध्यक्षतामा सम्पन्न कार्यक्रममा नेपाल पत्रकार महासंघका केन्द्रीय सचिव अशोक तिवारी, लेखा समिति संयोजक केसी लामिछाने, मधेस प्रदेश अध्यक्ष श्याम बन्जारा, कोषाध्यक्ष अनिल गौरो, पर्साका अध्यक्ष ओमप्रकाश खनाल, मिडिया काउन्सिल मधेस प्रदेशकी सदस्य बन्धना कुमारी झा, रिंकु मिश्र लगायतले सञ्चार क्षेत्रका अवस्था र चुनौतीबारे आफ्ना धारणा राखेका थिए ।
कलैयास्थित होटल सर्वोत्तममा सम्पन्न उक्त कार्यक्रममा पर्सा र बाराका चार दर्जनभन्दा बढी विभिन्न सञ्चारमाध्यमका सञ्चालक तथा प्रतिनिधिहरूको सहभागिता रहेको थियो ।
