वीरगंज । नेकपा एमालेको ११औँ महाधिवेशन अन्तर्गत हुने केन्द्रीय सदस्य पदको निर्वाचनमा संस्थापन पक्ष (केपी शर्मा ओली प्यानल) बाट पर्साका तीन जना नेताले उम्मेदवारी दर्ता गराएका छन्।
उम्मेदवारी दिनेहरूमा वीरगंज महानगरपालिकाका पूर्व मेयर विजय सरावागी, प्रभु हजरा र निर्मला देवकोटा रहेका छन् । पूर्व मेयर सरावागीले मधेसी खुला क्लष्टरतर्फ उम्मेदवारी दिएको जानकारी दिँदै पार्टी संगठन सुदृढीकरण, मधेसका मुद्दाको प्रभावकारी उठान र राष्ट्रिय राजनीतिमा सशक्त भूमिका निर्वाह गर्ने प्रतिबद्धता व्यक्त गरेका छन् ।
वीरगंज महानगरपालिकाका पहिलो निर्वाचित मेयरसमेत रहेका सरावागी पार्टीभित्र सक्रिय छन् । जिल्लाका अन्य नेतामध्ये उनी वीरगंज महानगर क्षेत्रमा जनतामाझ लोकप्रिय छन् । उनको उम्मेदवारीले मधेस क्षेत्रको प्रतिनिधित्व अझ बलियो हुने अपेक्षा गरिएको छ । उनको सहभागितापछि पार्टी थप मजबुत र चलायमान बनेको नेताहरूले प्रतिक्रिया दिएका छन्।
यस्तै, पर्साकै प्रभु हजराले केन्द्रीय सदस्य दलित खुला क्लष्टरबाट र निर्मला देवकोटाले भूगोल (मधेश प्रदेश) महिला क्लष्टरतर्फ उम्मेदवारी दर्ता गराएका छन् ।
यसैबीच, पर्साबाट केन्द्रीय सदस्य पदका लागि अन्य सात जना नेताले पनि उम्मेदवारी दर्ता गराएका छन् । तीमध्ये केहीले इश्वर पोखरेलको टिमबाट र केहीले स्वतन्त्र रूपमा उम्मेदवारी दिएको बुझिएको छ ।
