वीरगंज । आगामी फागुन २१ गते हुने प्रतिनिधि सभा निर्वाचनका लागि नेपाली कांग्रेसले पर्साका चारै निर्वाचन क्षेत्रबाट पुरानै नेताहरूको नाम सिफारिस गरेको छ । क्षेत्रीय कार्यसमितिका सिफारिस अनुसार प्रत्यक्षतर्फ अधिकांश पुराना अनुहारहरूलाई फेरि अग्राधिकार दिइएको छ ।
पर्सा क्षेत्र नम्बर १ बाट कांग्रेस केन्द्रीय सदस्य तथा संविधानसभा सदस्य अनिल रुंगटाको एकल नाम सिफारिस भएको छ । २०७४ को निर्वाचनमा पनि प्रत्यक्षतर्फ प्रतिस्पर्धा गरेका रुंगटा पराजित भएका थिए ।
पर्सा क्षेत्र नम्बर २ मा पूर्वमन्त्री तथा केन्द्रीय सदस्य अजय चौरसिया, पूर्वसंविधानसभा सदस्य राजेन्द्र बहादुर अमात्य र नेविसंघका पूर्वजिल्ला सभापति राकेश यादवको नाम सिफारिस गरिएको छ । सिंहदरबारदेखि सडकमै सक्रिय चौरसिया तीन पटकका सांसद तथा निर्वतमान कानुनमन्त्री समेत हुन् । अमात्य २०७० मा क्षेत्र नम्बर १ बाट संविधानसभा सदस्य निर्वाचित भएका थिए भने यादव युवा नेतृत्वका रूपमा परिचित छन् ।
यस्तै पर्सा क्षेत्र नम्बर ३ बाट पूर्वमन्त्री तथा चार पटकका पूर्वसांसद सुरेन्द्र प्रसाद चौधरी, प्रदेशका पूर्वमन्त्री तथा प्रदेश सभा सदस्य जनार्दन सिंह क्षेत्री, नेविसंघका पूर्वकेन्द्रीय सदस्य शम्भु चौहान, किसान नेता असर्फी साह र भगवती चौधरी गरी पाँच जनाको नाम सिफारिस गरिएको छ ।
पर्सा क्षेत्र नम्बर ४ मा भने पुनः पूर्वमन्त्री तथा चार पटकका पूर्वसांसद रमेश रिजालकै नाम एकल रूपमा सिफारिस गरिएको छ । रिजाल २०४८ देखि २०७९ सम्म कांग्रेसका तर्फबाट निरन्तर प्रतिस्पर्धा गर्दै आएका नेता हुन् ।
जेन जि आन्दोलनपछि नयाँ नेतृत्वको माग बढिरहेको बेला कांग्रेसले फेरि पुरानै नेताहरूमाथि भरोसा राखेपछि युवामाझ आलोचना चुलिएको छ । युवाहरूले “कांग्रेस बाहुन र पुरानै नेताहरूको पार्टीजस्तै देखिन थालेको” गुनासो सार्वजनिक गरेका छन् ।
यता कांग्रेसका युवा नेताहरू भने आगामी निर्वाचनमा पनि यी नेताहरूले टिकट पाउने र विजयी भइ पार्टीलाई सुदृढ बनाउने दाबी गरिरहेका छन् ।
