बीरगंज । नवरात्रको तेस्रो दिन आज बीरगंजस्थित प्रसिद्ध धार्मिकस्थल गहवामाई मन्दिरमा दर्शन तथा पूजाआराधना गर्न आउने भक्तजनको घुइँचो लागेको छ। बिहानैदेखि मन्दिरमा श्रद्धालुहरूको उल्लेख्य उपस्थिति देखिएको छ।
नवरात्रको अवसरमा भक्तजनहरू गहवामाईको दर्शन, पूजाआराधना तथा मनोकामना पूरा हुने धार्मिक विश्वासका साथ मन्दिर पुगिरहेका छन्। मन्दिर परिसरमा बिहानैदेखि भक्तिमय वातावरण बनेको छ।
दसैँको नवरात्रमा देवीको पूजा आराधना गर्ने परम्पराअनुसार तेस्रो दिन आज चन्द्रघण्टा देवीको पूजा गरिँदैछ। यस अवसरमा गहवामाई मन्दिरमा पनि भक्तजनले श्रद्धापूर्वक पूजा आराधना गरी आशीर्वाद लिइरहेका छन्।
बडादसैँ नजिकिँदै जाँदा गहवामाई मन्दिरमा भक्तजनको चहलपहल थप बढ्ने अपेक्षा गरिएको छ। गहवामाई मन्दिर बीरगंज तथा आसपासका क्षेत्रका श्रद्धालुहरूको प्रमुख आस्थाको केन्द्रका रूपमा परिचित छ।
