वीरगंज । स्वास्थ्य तथा जनसंख्यामन्त्री डा. सुधा गौतम शर्माले सोमबार पर्साको नारायणी अस्पतालमा आकस्मिक स्थलगत अनुगमन गर्दै अस्पतालको सेवा प्रवाह, स्रोतसाधनको उपयोग र भौतिक संरचनाको अवस्थाबारे जानकारी लिएकी छन्। आकस्मिक कक्षदेखि आईसीयू तथा विभिन्न वार्डहरूको निरीक्षणपछि उनले अस्पताल जीर्ण हुँदै गएको अवस्थाप्रति चिन्ता व्यक्त गरिन्।
अनुगमनपछि आयोजित अनौपचारिक कार्यक्रममा मेडिकल सुपरिटेन्डेन्ट (मेसु) डा. चितरन्जन साहले अस्पतालको वर्तमान सेवा, चुनौती र आवश्यकताबारे विस्तृत जानकारी गराए।
मन्त्री गौतमले पर्सा जिल्ला तथा आसपासका नागरिकका लागि नारायणी अस्पताल संघीय सरकारले उच्च प्राथमिकतामा राखेको अस्पताल भएको उल्लेख गर्दै, स्रोतसाधन हुँदाहुँदै पनि स्वास्थ्य सेवा पछाडि पर्नु गम्भीर विषय भएको बताइन्। उनले दरबन्दी अनुसार स्वास्थ्यकर्मी नआउने समस्याको समाधानका लागि कार्यकाे उपयुक्त वातावरण बनाउन सबै सरोकारवालाले भूमिका निभाउनुपर्नेमा जोड दिइन्।
अस्पतालको भौतिक संरचना जीर्ण बनेको स्वीकार गर्दै उनले भवन निर्माण प्रक्रियामा देखिएका जटिलता समाधान गर्न सहरी विकास तथा भवन निर्माण विभागसँग समन्वय गर्ने आश्वासन दिइन्। साथै, वातावरणीय प्रभाव मूल्याङ्कन (EIA) प्रक्रिया टुङ्ग्याई आगामी आर्थिक वर्षको बजेटमा नयाँ भवन निर्माणलाई समावेश गरिने पनि बताइन्।
अस्पतालमा नर्स तथा स्वास्थ्यकर्मीको संख्या वृद्धि गर्दै सेवा अझ प्रभावकारी बनाइने उनको प्रतिवद्धता थियो।
अनुगमनमा प्रमुख जिल्ला अधिकारी भोला दाहाल, राष्ट्रिय अनुसन्धानका उपअनुसन्धान निर्देशक सन्तोष दाहाल, जिल्ला प्रहरी कार्यालयका प्रहरी नायब उपरीक्षक हरि बहादुर बस्नेत, अस्पताल विकास समितिका अध्यक्ष धीरज गुप्ता, डा. नीरज सिंह, डा. सुरेन्द्र चौधरीलगायत सरोकारवालाहरूको उपस्थिति रहेको थियो।
