सेढवा । पर्साको पटेर्वासुगौली गाउँपालिका–४ उत्तर सुगौलीका युवा समाजसेवी मुकेश गौरोले एक अत्यन्त बिपन्न परिवारका तीन बालबालिकालाई न्यानो लुगा सहयोग गरेका छन् । जगरनाथपुर गाउँपालिका–३ बड्गोटोलका ग्यास मियाँका तीन सन्तानलाई उनले जुत्ता, मोजा, टोपी, स्वीटर लगायतका न्यानो सामग्री वितरण गरेका हुन् ।
सो सहयोग नेपाल राष्ट्र प्राथमिक विद्यालय, बड्गो पुगेर विद्यालय प्रशासनको उपस्थितिमा हस्तान्तरण गरिएको थियो ।
युवा समाजसेवी गौरोका अनुसार समुदायभित्र रहेका जोखिमपूर्ण अवस्थामा रहेका बालबालिकाहरूलाई सकेसम्म व्यक्तिगत रूपमा सहयोग गर्दै आएको र नसक्दा सामाजिक सञ्जालमार्फत जानकारी गराउँदा विभिन्न दाताहरूबाट समेत सहयोग प्राप्त हुने बताइएको छ । “समाजका बालबालिकाको आधारभूत आवश्यकताको संरक्षण गर्नु सबै नागरिकको नैतिक दायित्व हो,” गौरोले बताए ।
श्री ने रा प्रा बि बड्गोका प्रधानाध्यापक ओमप्रकाश चौधरीले ती तीन बालबालिकाको न्यानो वस्त्र आवश्यक रहेको भन्दै फेसबुकमार्फत सहयोगको आग्रह गरेका थिए । सामाजिक सञ्जालमै पोस्ट देखेर गौरोले तुरुन्तै सहयोग अघि बढाएका हुन् ।
समुदायमै मानवता र सहकार्यको उदाहरण प्रस्तुत गर्दै गरिएको यो सहयोगले स्थानीय अभिभावक तथा विद्यालय परिवारले प्रशंसा व्यक्त गरेका छन् ।
