परवानीपुर । जनता समाजवादी पार्टी (जसपा) नेपालद्वारा अघि सारिएको २८ बुँदे मागलाई जन–जनसम्म पुर्याउने उद्देश्यसहित सुरु गरिएको राष्ट्रिय जनजागरण अभियानको अन्तर्गत पर्सा क्षेत्र नं.–४ परवानिपुर चौकमा आज कार्यक्रम अत्यन्तै उत्साहपूर्ण वातावरणमा सम्पन्न भएको छ। कार्यक्रम क्षेत्रीय अध्यक्ष सञ्जु साहको अध्यक्षतामा आयोजित गरिएको थियो।
कार्यक्रममा देशमा असमानता, अस्थिरता र अपमानजनक प्रतिनिधित्वको समस्याको समाधानका लागि जसपा नेपालले तीन प्रमुख प्रतिज्ञा प्रस्तुत गरेको छ— प्रत्यक्ष निर्वाचित कार्यकारी, पूर्ण समानुपातिक समावेशी संसद र जनसंख्या आधारित निर्वाचन क्षेत्र। पार्टीका नेताहरूका अनुसार यस्ता संरचनागत परिवर्तनले मात्र देशमा स्थायित्व, समानता र न्याय सुनिश्चित गर्न सकिन्छ।
कार्यक्रममा युवा, किसान, मजदूर, व्यापारी, महिला तथा Gen-Z वर्गको उल्लेखनीय सहभागिता रहेको थियो। सहभागीहरूको जोश, उत्साह र चासोले समाजमा राजनीतिक सुधार र परिवर्तनको बलियो चाहना रहेको संकेत दियो।
वक्ताहरूले जसपा नेपालको २८ बुँदे माग साधारण राजनीतिक कागज नभई समानता र समावेशितामूलक राज्य संरचना निर्माणको राष्ट्रिय प्रतिज्ञा भएको उल्लेख गर्दै यसको महत्व जनतामाझ स्पष्ट पारे।
परवानिपुरका स्थानीयवासीप्रति धन्यवाद व्यक्त गर्दै नेताहरूले जनताको समर्थन र हौसलाले अभियान अझ मजबुत बनेको प्रतिक्रिया दिएका छन्।
