वीरगंज । भिएस पावरप्ले टी–२० चैलेन्ज अन्तर्गत जारी वीरगंज स्कुल कप २०८२को पाँचौँ दिन शुक्रबारका सेमिफाइनल खेलहरू सकिँदा बाल एकता सेकेन्डरी इंग्लिश बोर्डिङ स्कूल र ग्रीन ल्यान्ड सेकेन्डरी स्कूल उपाधि प्रतिस्पर्धामा प्रवेश गर्न सफल भएका छन्।
पहिलो सेमिफाइनलमा टस जितेर पहिले ब्याटिङ गरेको बाल एकता सेकेन्डरी इंग्लिश बोर्डिङ स्कूलले निर्धारित २० ओभरमा ६ विकेटको क्षतिमा १२४ रन बनाएको थियो। जवाफमा मैदान उत्रिएको विद्या साधन सेकेन्डरी स्कूल मात्र १४.३ ओभरमै ४९ रनमा समेटिँदा बाल एकताले ७५ रनको फराकिलो अन्तरमा जित सुनिश्चित गर्यो। शानदार ३१ रन प्रहार गरेका मनिभुषण यादव ‘म्यान अफ द म्याच’ घोषित भए।
यस्तै दोस्रो सेमिफाइनलमा साउथ जोन सेकेन्डरी स्कूलले टस जितेर पहिले ब्याटिङ गर्दै २० ओभरमा ७ विकेटको क्षतिमा १०९ रनको लक्ष्य प्रस्तुत गरेको थियो। तर ग्रीन ल्यान्ड सेकेन्डरी स्कूलले सन्तुलित खेल प्रदर्शन गर्दै १९ ओभरमै ७ विकेट गुमाउँदै ११० रन पूरा गर्यो र ३ विकेटको जित हात पार्दै फाइनलमा प्रवेश गर्यो। ३१ रनसहित ३ विकेट झारेका सोहेब शेख ‘म्यान अफ द म्याच’ बने।
प्रतियोगिता उत्कर्षमा पुगेसँगै अब उपाधिका लागि बाल एकता सेकेन्डरी इंग्लिश बोर्डिङ स्कूल र ग्रीन ल्यान्ड सेकेन्डरी स्कूलबीच रोमाञ्चक भिडन्त हुने भएको छ। फाइनल खेल भोलि बिहान १० बजे नारायणी क्रिकेट ग्राउन्ड वीरगंजमा हुनेछ। विद्यालय क्रिकेटलाई वीरगंजमा अझ मजबुत रूपमा स्थापित गर्ने उद्देश्यले विद्या साधन सेकेन्डरी स्कूलले प्रतियोगिताको आयोजना गरेको हो।
