वीरगंज । लैङ्गिक हिंसा विरुद्धको १६ दिने अभियानको अवसरमा मंगलबार लागुऔषध दुरुपयोग रोकथाम तथा जनचेतनामूलक कार्यक्रम आइडिएल बोर्डिङ स्कूल, छपकैयामा सम्पन्न भएको छ।
सामुदायिक प्रहरी सेवा केन्द्र छपकैयाको आयोजनामा तथा आइडिएल बोर्डिङ स्कूलको सहकार्यमा आयोजित कार्यक्रममा शिक्षक–शिक्षिका, विद्यार्थी, अभिभावक, स्थानीयवासी तथा सामुदायिक प्रहरी प्रतिनिधिहरूको उल्लेख्य उपस्थिति रहेको थियो।
कार्यक्रममा सहभागीहरूलाई लागुऔषधको असर, जोखिम, कानुनी परिणाम, सामाजिक प्रभाव तथा किशोर–किशोरीलाई लागुऔषधको जोखिमबाट जोगाउन परिवार र समुदायको भूमिकाबारे विस्तृत जानकारी प्रदान गरिएको थियो।
सामुदायिक प्रहरी सेवा केन्द्र छपकैयाका अध्यक्ष ग्यासुदिन ठकुराईको अध्यक्षतामा सम्पन्न कार्यक्रममा वडा अध्यक्ष रियाज मिया तेलि, वडा सदस्य बसिर मिया, स्कूल निर्देशक शौकत अली, प्रिन्सिपल विकास राईलगायतको विशेष उपस्थिति रहेको थियो।
वक्ताहरूले विद्यालय स्तरमै सुरु हुने सचेतनाले बालबालिकालाई गलत बाटोबाट जोगाउन महत्वपूर्ण प्रभाव पार्ने भन्दै निरन्तर जनचेतनामूलक गतिविधि आवश्यक रहेको धारणा व्यक्त गरे।
कार्यक्रममा विद्यार्थी तथा अभिभावकलाई लागुऔषध विरुद्ध सजग रहन, शंकास्पद गतिविधि देखिएमा तुरुन्तै सुरक्षा निकायलाई खबर गर्न र सुरक्षित तथा स्वस्थ समाज निर्माणमा सक्रिय भूमिका खेल्न आग्रह गरिएको थियो।
