वीरगंज । अख्तियार दुरुपयोग अनुसन्धान आयोगले रौतहटको कटहरिया नगरपालिकामा नक्कली जनचेतनामूलक डकुमेन्ट्री निर्माण प्रकरणमा संलग्न ठहर गर्दै तत्कालीन निमित्त प्रमुख प्रशासकीय अधिकृत राम प्रकाश साहसहित ७ जनाविरुद्ध भ्रष्टाचार मुद्दा दायर गरेको छ ।
आर्थिक वर्ष २०७७/७८ मा जनचेतना अभिवृद्धि उद्देश्य राखिएको डकुमेन्ट्री निर्माणको नाममा नक्कली काम देखाई सरकारी रकम हिनामिना गरिएको आयोगको ठहर छ । यही आरोपमा मंगलबार आयोगले विशेष अदालत काठमाडौँमा मुद्दा दर्ता गरेको हो ।
आयोगका अनुसार नगरपालिकाले वार्षिक कार्यक्रम तथा बजेट विनानै बदनियतपूर्ण ढङ्गले ‘सरिता फाउन्डेसन’लाई डकुमेन्ट्री निर्माणको जिम्मा दिएको मात्र नभई सम्झौता विपरीत नगरप्रमुखको प्रशंसा मात्र गरिएको भिडियो तयार गरिएको थियो । सो भिडियो कतै प्रसारण नभएको, नक्कली कागजात सिर्जना गरी ९ लाख ९८ हजार ९ सय २१ रुपैयाँ भुक्तानी गरिएको अनुसन्धानले पुष्टि गरेको छ ।
मुद्दा दायर गरिएका व्यक्तिहरूमा तत्कालीन निमित्त प्रमुख प्रशासकीय अधिकृत राम प्रकाश साह, लेखापाल विवेक कुमार सहनी, सहायकस्तरका कर्मचारी राम नरेश प्रसाद यादव, उमेश कुमार दास तत्मा, खरिदार कौशल किशोर चौधरी र छोटेलाल मिश्र तथा सरिता फाउन्डेसनकी निर्देशक सरिता कुमारी साह रहेका छन् ।
आयोगले उनीहरूविरुद्ध ९ लाख ९८ हजार ९ सय २१ रुपैयाँ बिगो तोकी सोही रकम बराबरको जरिवाना र कैद सजायको मागदाबी गर्दै मुद्दा दायर गरेको जनाएको छ ।
